Almaty ákiminiń tapsyrmasy boıynsha megapolıste bıylǵy jyldyń sońyna deıin qosymsha 707 «Sergek» kamerasy iske qosylady. Olardyń 400-i kóshe qıylystaryna, 307-si jol jıegindegi ýchaskelerge ornatylmaq. Bul týraly qala ákiminiń baspasóz qyzmeti habarlady.
Bul júıe jyldamdyqty arttyrǵan, baǵdarshamnyń qyzyl túsine júrgen, qyzyl syzyqtan asyp ketken jáne avtobýs jolaǵymen júrgen kólikterdi birden sýretke túsiredi. Budan ózge, jańa tehnologııany paıdalaný qylmystyń izin sýytpaı, jedel ashýǵa yqpal etedi.
Polısııa departamenti ókilderiniń pikirinshe, mundaı beketterdiń kóp bolýy kólik júrgizýshilerdi tártipke shaqyrady. Aıyppul tóleý kezinde adamı faktorlar joıylady. Tártip buzýshylyq avtomatty túrde birden málimetter bazasyna túsedi jáne kólik ıesine jiberiledi.
Eske salsaq, bul júıe aǵymdaǵy jyldyń naýryz aıyna deıin 8 aı boıyna testilik rejimde jumys jasaǵan. Osy kezeń ishinde qalanyń barynsha qaýipti aımaqtary anyqtaldy, endi «Sergek» sol jerlerge ornatylady.
Aıta keterligi, Nur -Sultanda «Sergekti» qoldaný onyń tıimdi ekenin kórsetti. Astanalyq avtomobılıster men qala qonaqtarynyń júrgizýshilik mádenıetiniń arqasynda 2017 jylmen salystyrǵanda joldaǵy ólim eki ese tómendegen. Eger elordada 2017 jyly jol apattarynan 60 adam kóz jumsa, 2018 jyly 34 adam ajal qushqan.