О́ńirde áleýmettik jaǵynan az qamtylǵan 303 kópbalaly otbasy esepke alynsa, 220-sy úı kezeginde tur.
Aldaǵy jyldary kópbalaly otbasylarǵa arnalyp 81 páter salynatyn bolady. Bul týraly óńirimizge at basyn tiregen Parlament Senatynyń depýtaty Olga Perepıchına málimdedi. Halyq qalaýlysy jumys sapary barysynda 19-shy yqsham aýdanda salynyp jatqan turǵyn úılerdiń qurylysymen, sondaı-aq jumys qarqyny báseńdep ketken «Edınstvo» JShS-niń tynys-tirshiligimen tanysty. M.Qozybaev atyndaǵy SQMÝ-de bolyp, bıyl salynatyn jańa jataqhananyń josparyn kórdi.
«Edınstvo» kásiporny úılerdiń qasbetin qaptaýǵa arnalǵan temir betondar, basqa da qurylys materıaldaryn shyǵarýmen aınalysady. Biraq zamanaýı qurylǵylarmen jabdyqtalǵanyna qaramastan munda jumys qarqyny báseńdep ketken. Tek jetkizýshi ról ǵana atqaryp otyr.
«Osnovanıe», «Alfa sever» sekildi kompanııalar qurylys materıaldaryn bizden alady. Basqalarmen salystyrǵanda baǵanyń sál-pál qymbattaý bolýy ınertti materıaldardyń quny sharyqtap ketti. О́ńirde sement zaýyty joq bolǵandyqtan ony Ońtústik Oraldan, al qıyrshyq tasty 200 shaqyrym jerden tasımyz. Munyń bári – qyp-qyzyl shyǵyn. Desek tebásekelestikke daıynbyz», deıdi «Edınstvo» JShS-niń dırektory Andreı Tıtov.
Zaýyt jylyna 46 myń sharshy metr qurylys materıaldaryn shyǵarýǵa qaýqarly bola tura tutynýshylarǵa 5 myń sharshy meter ónimdi kem jetkizgen. Jumysshylar sany 140-tan 80-ge deıin qysqarǵan. Kelisim-shart jasasqan áriptesteriniń qaryzy 300 mıllıon teńgeden asyp ketken. Solardyń biri –19-shy shaǵyn aýdanda 5 qabatty turǵyn úı salyp jatqan «Aksent KZ» JShS. Munda qurylys qarqyny óte baıaý. Áleýeti onymen deńgeıles «Alfa Sever» JShS-i eki úıdi paıdalanýǵa bergen.
Senat depýtaty turǵyndarmen tildesip, jańa baspanalardyń sapasy jaıly, qandaı problemalar tolǵandyratynyn surap bildi.
«Oblysta 19 myń adam úı kezeginde tur. Olardyń 7 myńy – áleýmettik az qamtylǵandar. Petropavl qalasynda 10 kópqabatty jáne «Solnechnyı» kentinde 128 bir qabatty úılerdiń qurylysy júrip jatyr. Bul maqsatqa respýblıkalyq, oblystyq bıýdjetten, sondaı-aq ulttyq qordan 11 mıllıard teńge bólingen. Bul úıler jalǵa jáne ıpotekalyq negizde qoldanysqa beriledi», dedi O. Perepechına.
Halyq qalaýlysy M.Qozybaev atyndaǵy SQMÝ-ǵa da at basyn tiredi. Munda ol stýdentterge qyzmet kórsetetin ortalyqta bolyp, jumysymen tanysty. Paıdalanýǵa berilgennen beri ortalyq 21 myń qyzmet túrin usynypty.
Bıyl ýnıversıtet aýmaǵynda 1200 stýdentke shaqtalǵan 12 qabatty jataqhananyń qurylysy bastalady. Jobanyń smetalyq qujattar daıyn. Tek qaltaly ınvestor kútip otyr. Budan bólek, 300 stýdentke arnalǵan jataqhananyń qurylysy bastalyp, keler jyly qoldanysqa beriledi.
Soltústik Qazaqstan oblysy