Búgin Jambyl oblysynyń ákimi Asqar Myrzahmetovtyń tóraǵalyǵymen jıyn ótip, jıynda Taraz qalasyndaǵy «Shahrıstan» tarıhı-mádenı kesheniniń qurylys barysy qaraldy. Keshendegi qurylys jumystaryna jaýapty shtabtyń esebi tyńdalyp, jan-jaqty saralandy.
Atalǵan keshen aǵymdaǵy jylǵy kúz mezgilinde atalyp ótilýi tıis oblystyń 80 jyldyq mereıtoıyna deıin tolyǵymen aıaqtalyp, paıdalanýǵa berilýi kerek. Alaıda mundaǵy qurylys jumystarynyń búgingi tańdaǵy qarqyny kóńil kóńshitpeıtini jıynda ashyq aıtyldy. Osy máselege jiti nazar aýdarǵan Asqar Myrzahmetov qurylys jumystaryn jandandyra túsý kerektigin basa aıtty. Ol úshin eki aýysymdyq rejımge negizdelgen jańa jumys kestesi bekitildi. Sol boıynsha merdigerlerdiń jumysy shıratylyp, qarqyny kúsheıtilmek. Alaıda ákim ýaqyttan utamyz dep, qurylys sapasyn nazardan tys qaldyrmaý kerektigin qatań eskertti.
Sonymen qatar jıyn barysynda endigi kezekte jumys rejıminiń ózgerýine baılanysty, qurylysqa qajetti materıaldardy ýaqtyly jetkizip otyrý jaıy da sóz boldy. Bul oraıda materıaldardy óndirýshilermen aldyn-ala kelisimge otyryp, qajetti buıymdardy kúni buryn daıyndatyp qoıýdyń mańyzdylyǵy aıtyldy. Asqar Myrzahmetov bul jumystardy kúndelikti óz baqylaýynda ustaıtynyn jetkizip, tıisti tulǵalarǵa naqty tapsyrmalar berdi.
Jambyl oblysy