Elimizdiń Ulttyq qaýipsizdik komıteti kıberqaýipsizdik pen aqparattyq qaýipsizdikti qamtamasyz etý maqsatynda buǵan deıin derbes qurylǵylarǵa jappaı ornatý usynylǵan qaýipsizdik sertıfıkatynyń synaqtan sátti ótkizilgenin jáne testileýdiń merzimi aıaqtalǵanyn habarlady.
Osy oraıda, Memleket basshysy Qasym-Jomart Toqaev týıtterdegi paraqshasynda óziniń tapsyrmasy boıynsha UQK Kıberqalqan baǵdarlamasy aıasynda sertıfıkat qaýipsizdigin testileýden ótkizgenin jáne Qazaqstannyń aqparat keńistigi qaýipsizdigi jáne sertıfıkatty syrttan qaýip tóngen jaǵdaıda ǵana qoldaný múmkindigi dáleldengenin jazdy. Prezıdent sonymen qatar bul synaqtyń ınternet qoldanýshylarǵa qolaısyzdyq týǵyzbaǵanyn kórsete otyryp, Ulttyq qaýipsizdik komıtetine alǵys bildirdi.
Memleket basshysy: «Kıberqalqan baǵdarlamasy boıynsha qaýipsizdik sertıfıkatyn testileýdiń jedel aıaqtalýy syrttan qaýip tóngende tehnıkalyq jabdyqtalý deńgeıiniń joǵary ekenin kórsetti. Mundaı jaǵdaılar buryn bolǵan. Eń bastysy, Qazaqstannyń ınternet qoldanýshylaryna qolaısyzdyq bolmaıdy. Qaýiptenýge esh negiz joq», dep atap ótti.
Al Ulttyq qaýipsizdik komıtetiniń baspasóz qyzmeti bul synaqtyń kıber jáne aqparattyq keńistikte kıberqaýiptiń aldyn alý júıesin tekserip kórýge múmkindik bergenin málimdedi.
Resmı derekterge qaraǵanda, Aqparattyq qaýipsizdiktiń ulttyq úılestirý ortalyǵy tek ótken aıda ǵana memlekettik organdar men jeke kompanııalarǵa qatysty 8 mln márte vırýstyq belsendilikti jáne 130 myń kıbershabýyldy anyqtaǵan. Odan bólek, birqatar memlekettik organdarǵa kıbertyńshylyq jasaý faktileri ashylǵan. Sonymen qatar sertıfıkat engizýdiń túıtkildi máseleleri zerdelenip, baılanys operatorlarynyń jumysyna yqpal etetin tustary tekserilgen. Bul josparly jumys «Qazaqstan Respýblıkasynyń Ulttyq qaýipsizdigi týraly» Zańǵa sáıkes jáne kıberqaýipsizdik pen aqparattyq qaýipsizdikti qamtamasyz etý maqsatynda júzege asyrylǵan.
Saıyp kelgende, sertıfıkat bolashaqta ulttyq qaýipsizdikke kıber jáne aqparattyq shabýyl qateri tóngen jaǵdaıda el azamattaryna aldyn ala eskertile otyryp, qoldanylatyn bolady. Sonymen testileý jumystary 7 tamyzdan bastap toqtatyldy.
Buǵan deıin, ásirese Nur-Sultan qalasynyń turǵyndary arasynda osy qaýipsizdik sertıfıkatyn ornatýǵa baılanysty túsinispeýshilikter týyndaǵan bolatyn. Qoǵamda ony ornatý qajettiligi, júrgizilýi múmkin «ańdýlar» týraly pikirtalastar órship ketti.
Sondyqtan bul máselege Bas prokýratýra aralasyp, jeke ómirge qolsuǵylmaýshylyqqa, jeke basy men otbasy qupııasyna, hat almasýǵa, telefon arqyly sóılesýge, habarlarǵa konstıtýsııalyq quqyqtardyń saqtalatynyna memleket kepildik beretinine nazar aýdardy. Sondaı-aq atalǵan talaptardy buzý qylmystyq jaýapkershilikke ákeletinin málimdedi. Atap aıtqanda, elektrondy aqparattyq resýrstarǵa, aqparattyq júıege zańsyz kirý nemese telekommýnıkasııalar jelisi boıynsha beriletin aqparatty zańsyz ustap qalý úshin qylmystyq jaýapkershilik bar jáne bes jylǵa deıin bas bostandyǵynan aıyrý kózdelgen (Qylmystyq kodekstiń 147-babynyń 3-bóligi). QK 148-babynda hat jazysý, telefonmen sóılesý, poshta, telegraf habarlary nemese ózge de habarlar qupııasyn zańsyz buzǵany úshin jaýapkershilik belgilengen.
Endi qaýipsizdik sertıfıkatyn synaqtan sátti ótkizgen UQK osy ýaqytqa deıin atalǵan sertıfıkatty derbes qurylǵylaryna – uıaly telefon, kompıýter jáne t.b. qondyryp úlgergen qazaqstandyqtarǵa ony óshirýdiń de joldaryn kórsetetin nusqaýlyqtar taratty.