«Jyl basynan beri ótken 7 aı ishinde Batys Qazaqstan oblysy aýmaǵynda 175 márte qalta urlyǵy tirkeldi» dep habarlaıdy Batys Qazaqstan oblystyq Polısııa departamentiniń baspasóz qyzmeti.
Qalta urlyǵynyń basym bóligi Oral qalasynda tirkelgen. Mysaly, shildeniń 31 kúni kúndiz belgisiz bireý qaladaǵy saýda úılerdiń birinde 1967 jyly týǵan azamatshanyń sómkesinen jasyryn túrde «Kaspıı Gold» bankomat kartasyn urlap alǵan. Qoldanylǵan sharalar barysynda 1980 jyly týǵan. azamat anyqtalyp, ustaldy. Osyǵan uqsas jaǵdaı shildeniń 21-i kúni Muhıt kóshesiniń boıyndaǵy «Bereke» dúkeniniń janynda bolǵan. Ury 50 jasar qala turǵynynyń sómkesinen «Halyq banki» bankomat kartasyn urlap alyp, ile-shala kartadan 11 myń teńgeni «sýyryp» alǵan. Jedel-izdestirý is-sharalary nátıjesinde 1993 jyly týǵan azamatsha anyqtalyp, ustaldy. Urlanǵan zat tárkilendi.
- Atalǵan eki fakti boıynsha Qazaqstan Respýblıkasy Qylmystyq Kodeksiniń 188-baby 1-bólimine sáıkes qylmystyq is qozǵaldy. Tergeý júrgizilýde, - deıdi Polısııa departamenti baspasóz qyzmetkeri Asylaı Ǵubasheva.
Polısııa turǵyndardy halyq kóp jınalatyn qoǵamdyq oryndarda muqııat bolýǵa shaqyryp, qalta urlyǵyna tap bolǵan jaǵdaıda dereý polısııaǵa habarlasý qajettigin eskertýde.
Batys Qazaqstan