Salyqtyq ákimshilendirý aıasyndaǵy sıfrlandyrý salyqtyq tekserýlerdi 9%-ǵa qysqartyp, Qazaqstan bıýdjetiniń kirister bóligindegi túsimderdi 20%-ǵa arttyrýǵa jol ashty. Bul týraly Úkimettegi baspasóz konferensııasy barysynda QR birinshi qarjy vıse-mınıstri Berik Sholpanqulov málimdedi.
Onyń aıtýynsha, vedomstvonyń basym mindetteriniń biri - kóleńkeli ekonomıka deńgeıin EYDU elderiniń deńgeıine deıin tómendetý - JIО́-niń 15-17%.
Úkimet bekitken 2019-2021 jyldarǵa arnalǵan is-sharalar josparynyń aıasynda memlekettik organdar «Atameken» UKP-men birlese otyryp, salyq jáne keden saıasatyn jetildirý jáne qolma-qol aqshasyz aınalymdardyń úlesin arttyrý arqyly shaǵyn jáne orta bıznes sýbektilerin «kóleńkeden» shyǵarý jumysyn júrgizýde. Jumystar salyqtyq jáne kedendik ákimshilendirýdi sıfrlandyrýǵa, aqparattyq júıelerdi biriktirýge negizdelgen.
«Sıfrlandyrý boıynsha qabyldanyp jatqan sharalar qazirdiń ózinde salyqtyq tekserýlerdi 9%-ǵa qysqartý jáne bıýdjetke túsetin kiristerdi 20%-ǵa kóbeıtý túrinde oń áserin tıgizýde», dedi B. Sholpanqulov.
Salyq jáne kedendik ákimshilendirýdi sıfrlandyrý aldaǵy úsh jyl ishinde bıýdjetke 1,9 trln teńge kóleminde qosymsha túsimderdi qamtamasyz etedi (2019 jyly 520 mlrd teńge, 2020 jyly 623 mlrd teńge jáne 2021 jyly 750 mlrd teńge).
Sonymen qatar, halyq pen bıznestiń esep aıyrysýynyń qolma-qol aqshasyz formasynyń kólemin ulǵaıtý sharalary qabyldanyp jatyr. Qolma-qol aqshasyz formada jyljymaıtyn múlikpen jasalatyn mámilelerdi júzege asyrýdy yntalandyrý, salyq tólemderin jeńildetý úshin salyq tóleýshiniń elektrondy ámııanyn engizý máseleleri qaralýda.
О́z kezeginde QR Qarjy mınıstrliginiń Memlekettik kirister komıteti tóraǵasynyń orynbasary Jaıdar Ińkárbaev bıznes júrgizý rásimderin jeńildetý jáne patentke negizdelgen rejımge kóshý múmkindigi týraly aıtyp berdi.
«Jalpy, patent bastapqyda jaldamaly jumysshylarsyz ózin-ózi jumyspen qamtyǵan kásipkerler sanatyna arnalǵan edi. Naryqtaǵy bıznestiń negizgi úlesinde jaldamaly jumysshylar bar jáne olardyń aınalymy patentke ruqsat etilgen deńgeıden asady. Birtindep kóshý josparlandy. Jeńildetilgen deklarasııada bar bolǵany 3%, al patentte barlyq salyqtardyń 2%-y. Jeńildetilgen rejım tómen salystyrmaly júktemeni jáne ońaılatylǵan esepke alýdy topshylaıdy. Sondyqtan biz qazir basqa rejımderge ótý prosedýrasyn uzartýdyń qajeti joq dep sanaımyz», dedi Jaıdar Ińkárbaev.