Bıyl Soltústik Qazaqstanda 142 bilim berý nysanyn qalpyna keltirý belgilengen bolatyn. Buǵan deıin jóndeý jumystaryna ári ketse jyl saıyn 400-500 mıllıon teńge bólinip kelse, osy joly 5 mıllıard teńge qarastyrylǵan. Bul – buryn-sońdy bolmaǵan rekordtyq kórsetkish.
Qoldaǵy derekterge súıensek, Petropavl qalasynda 30 bilim oshaǵy jańartylmaq.
17 mekteptiń terezeleri aýystyrylyp, aýmaqtary qorshalyp, shatyrlary, sportzaldar, ǵımarat qasbetteri árlengen. №7 mektepte 142 terezeniń 128-i, jertóledegi 4 qubyr aýystyrylǵan. Bul maqsatta 62 mıllıon teńge jumsalmaq.
Alaıda, jańa oqý jylynyń bastalýyna sanaýly kúnder qalǵanyna qaramastan, jalpy jóndeý jumystarynyń úshten biri ǵana oryndalǵan. Oǵan merdigerlerdiń salǵyrttyǵy keri áser etip otyrǵany baıqalady. Mysaly, oblys ortalyǵyndaǵy №10 mektep «Eńbek-О́skemen» qurylys kompanııasymen 1 maýsymda kelisimshart jasasqan. Dese de áli kúnge deıin tender ótkizilmegen. Shyǵystan yrǵalyp-jyrǵalyp, artynyp-tartynyp kelgenshe ýaqyt zymyrap óte shyqqan. Mektep dırektory Tatıana Ansıbor janyn shúberekke túıgen kúıi qansha jazbasha suraý salsa da, áli kúnge deıin jaýap joq. 136 terezeden 36-nyń ǵana qoıylýy esektiń mımyrt júrisin elestetedi. Qalalyq klassıkalyq gımnazııanyń basshysy Kúltaı Muqanova osy kompanııanyń dırektory atyna talap-hat jazyp, maıshammen izdegendeı kúı keshken. №8 mektepte 140 tereze aýystyrýdy kútip tur.
Áldeqashan apattyq dep tanylǵan Qojabergen jyraý atyndaǵy №6 mekteptiń jaǵdaıy tipti dabyl qaǵarlyq. Bilim bóliminiń basshylyǵy jańa ǵımaratqa kóshesińder degen ýádelerinen taıqyp ketip, eki ottyń ortasynda qaldyrǵan. Solaqaı sheshimniń qabyldanýynan-aq qazaq mektepterine degen kózqarastyń qandaı dárejede ekenin baǵamdaı berýge bolady. 22 kabınettiń 7-ýi ǵana daıyn. Dálizderge kirýdiń ózi qorqynyshty. Kúrdeli jóndeýge bólingen qarajattyń juǵyn bolatyn túri baıqalmaıdy.
Soltústik Qazaqstan oblysy