Qazaqstandyqtardyń jeke málimetteriniń taralýyna qatysty QR Ishki ister mınıstrligi tergeý jumystaryn júrgizýde, dep habarlaıdy QazAqparat mınıstrliktiń baspasóz qyzmetine silteme jasap.
«Ishki ister mınıstrligine sheteldik serverlerde qazaqstandyqtardyń jeke derekteriniń taralý faktisi boıynsha sharalar qoldaný týraly «SARKA» (Kıber shabýyldardy tergeý jáne taldaý ortalyǵy) zańdy tulǵalar birlestiginen shaǵym tústi.
Osy aqparatty tekserý úshin ishki ister organdary QR QK 211-baby 1-bóligi (Qoljetimdiligi shektelgen elektrondyq aqparattyq resýrstardy quqyqqa syıymsyz taratý) boıynsha sotqa deıingi tergeý jumystaryn bastady», delingen habarlamada.
Mınıstrliktiń málimetinshe, qazirgi kezde atalǵan derekqordyń ıeleri men derekterdi taratqandardy anyqtaý boıynsha jedel sharalar jáne tergep-tekserý júrip jatyr.
Eske sala ketsek, keshe «SARKA» ZTB Facebook-tegi paraqshasynda 11 mln qazaqstandyqtyń jeke málimetteriniń taralýyna qatysty QR IIM-niń resmı hatyn jarııalady. Aıta keterligi, QR Ortalyq saılaý komıssııasy óz serverlerinen derekterdiń taralyp ketýin joqqa shyǵarǵan bolatyn.