El aýmaǵyndaǵy eńbekke jaramdy halyqtyń 15 paıyzyn jumyspen qamtyp otyrǵan Almaty – otandyq ekonomıkanyń iri ortalyǵy. Kún sanap aýmaǵy artqan alyp shahar tyń tynys alyp, jańa turpatta damyp keledi. Premer-Mınıstr Asqar Mamın Almatyǵa jumys sapary barysynda megapolıstegi aýqymdy ınfraqurylym nysandarynyń qurylysymen tanysyp, Almaty qalasy men Almaty aglomerasııasyn damytý máseleleri jóninde alqaly keńes ótkizdi.
Almaty qalasyn damytýǵa baǵyttalǵan keńeste talqylanǵan negizgi máseleler qatarynda qoljetimdi turǵyn úı jáne áleýmettik nysandar sanyn kóbeıtý, jurtshylyqty turaqty jumyspen qamtý, kólik jáne jol ınfraqurylymyn jetildirý, kásipkerlikti damytý men týrıstik salanyń áleýetin arttyrý syndy mańyzdy taqyryptar saralandy. Úkimet basshysy qala men oblystaǵy halyq sany ósýiniń joǵary qarqynyna baılanysty damýdyń ózekti túıtkilderin sheship, sol arqyly óńirdiń ınvestısııalyq tartymdylyǵyn arttyrý qajet ekenin aıryqsha atap ótti. Ol birlesken jobalardy iske asyrý jáne alǵa jyljytý úshin Almaty men Almaty oblysynyń jobalyq ofısin qurýdy tapsyrdy.
Tuńǵysh Prezıdent – Elbasy Nursultan Nazarbaev táýelsizdiktiń altyn besigine balanatyn Almaty qalasynyń damýyna úlken kóńil bólip otyrǵanyn, Memleket basshysy Qasym-Jomart Toqaev qala ınfraqurylymynyń sapasyn jaqsartý, qoǵamdyq qaýipsizdikti nyǵaıtý, kólik júıesin, medısına men bilim berýdi damytý jóninde naqty tapsyrmalar bergenin tilge tıek etken Úkimet basshysy, memlekettik organdarǵa Almatynyń el ekonomıkasyndaǵy mańyzdylyǵyn atap ótip, mıllıondardy toǵystyrǵan megapolıstiń damýyn udaıy baqylaýda ustaıtynyn jetkizdi. Basqosý barysynda Almaty qalasynyń ákimi Baqytjan Saǵyntaev qalany damytý jobalary týraly baıandady.
Premer-Mınıstr Almaty qalasynyń shetkeri aýdandary men Almaty oblysynyń irgeles aýmaǵyn damytý kún tártibinde turǵan mańyzdy másele ekenin basa aıtty. Bul turǵyda atqarylyp jatqan aýqymdy jumystyń barlyǵy el ıgiligi men turǵyndardyń jaıly ómiri úshin jasalǵan memleket qoldaýy ekenin eskergen jón. Eske salsaq, 2019 jyly Tuńǵysh Prezıdent – Elbasy N.Á.Nazarbaevtyń tapsyrmasymen iri qalalardyń shetkeri aımaqtarynyń máselelerin sheshýge jyl saıyn 30 mlrd teńge, onyń ishinde Almaty qalasynyń shetkeri aımaqtaryna 10 mlrd teńge bólingen bolatyn.
«Aglomerasııa turǵyndarynyń turmys sapasyn jaqsartý jónindegi sharalardy júzege asyrý qala men oblystyń 730 myńnan astam turǵynyn tıisti ınfraqurylymmen qamtamasyz etýge múmkindik beredi», dedi A.Mamın.
Premer-Mınıstr keńes qorytyndysy boıynsha Qarjy jáne Ulttyq ekonomıka mınıstrlikterine múddeli memlekettik organdarmen, Almaty jáne Almaty oblysynyń ákimdikterimen birlesip, qala mańyndaǵy aýdandardy, irgeles aýmaqtardy damytý boıynsha is-sharalardy ýaqtyly júzege asyrýdyń qajetti sharalaryn qabyldap, qarjylandyrý máselelerin pysyqtaýdy tapsyrdy.
El Úkimetiniń basshysy «Ýrbanıstıka ortalyǵy» men №405 avıa jóndeý zaýytynda bolyp, Almaty qalasy qurylysynyń jańa jobasymen, qalanyń qurylys ındýstrııasyn damytý josparlarymen tanysty, sondaı-aq Qurylysshylar kúnine arnalǵan saltanatty jıynǵa qatysty.
Sondaı-aq Almaty qalasyna jumys sapary barysynda Premer-Mınıstr áıgili Alma-Arasan bókterindegi Aıýsaı shatqalyn tazartýǵa arnalǵan ekologııalyq senbilikke qatysyp, tabıǵat tazalyǵy men ekologııaǵa enjar qaraı almaıtyn el turǵyndaryna jaqsy úlgi kórsetti. Qala jurtshylyǵyn judyryqtaı jumyldyrǵan sharaǵa myńǵa tarta adam atsalysty. Elimizdiń ár aımaǵynda jappaı qoldaý taýyp jatqan «Birge – taza Qazaqstan!» ekologııalyq jobasy Úkimet basshysynyń tikeleı bastamasymen júzege asqan bolatyn.
ALMATY