Jeksenbiniń keshinde Almatydaǵy áıgili Kóktóbe baýraıy órtke orandy degen habar áleýmettik jeli arqyly jeldeı esti. Málim bolǵandaı, 11 tamyz kúni Nur-Sultan ýaqytymen saǵat 14.28-de qalalyq 101 qyzmetine Kóktebe munarasyna taıaý mańdaǵy taý alqabynda órt tutanǵany týraly habar kelgen.
Ishki Ister Mınıstrligi Tótenshe jaǵdaılar komıtetiniń resmı ókili Nursultan Nurahmettovtyń málimetinshe, dalaly alqaptaǵy órt saǵat 19.58-de tolyǵymen óshirildi. Tosyn jaǵdaı taý bókterinde oryn alǵandyqtan órtti birden sóndirý ońaıǵa soqpaǵan. Tilsiz jaýdy aýyzdyqtaýǵa 50-ge tarta maman men qos birdeı tikushaq jumyldyryldy. Jaýapty vedomstvo ókilderi habarlaǵandaı, adamdar men ǵımarattarǵa eshqandaı zalal tóngen joq. Bul týraly Almaty qalalyq Tótenshe jaǵdaılar departamentiniń basshysy Serik Áýbákirov: «О́rttiń jeke sektorǵa aýysýynyń aldyn aldyq. Tikushaqtar qaıtaryldy. Sýdy laqtyrý jumystary 12 ret oryndaldy. Sýdyń jalpy kólemi 36 tekshe metr. Bul, osyndaı jalyndardy óshirýde sheshýshi qural bolyp tabyldy. Ot tolyǵymen sóndirildi.О́rt sóndirý qyzmetiniń jeke quramy kezekshilik atqarý úshin oqıǵa ornynda qaldy» dep málimdegen bolatyn. Tótenshelikterden bólek «Almaty tazalyq» kásipornynyń sýarý kólikteri de tilsiz jaýmen kúresýge qatysty. О́rt myń sharshy metr aýmaqty sharpyǵan.
Dáp osy kúni araǵa birer saǵattar salyp Kóktóbe taýynyń mańynanan taǵy da órt shyqty. Mamandar qyzyl jalynmen tún jarymyna deıin arpalysty. О́rttiń betin qaıtarýǵa 100-den astam órt sóndirýshi, sondaı-aq 40-tan astam sý shashatyn jáne arnaıy tehnıka qatysqan. Jaýaptylar tilsiz jaýdyń órshýi aptap ystyqtan bolýy múmkin degen joramalǵa kelip otyr. Olardyń aıtýynsha, birinen soń biri oryn alǵan eki órttiń arasynda eshqandaı baılanys joq. Degenmen oqıǵa ornyna tún ortasynda kelgen Almaty qalasynyń ákimi Baqyjan Saǵyntaev ishki ister jáne qorǵanys mınıstrligi ókilderimen sóıleskenin jáne órt saldary anyqtalyp jatqanyn jetkizdi.
Tótenshe jaǵdaılar departamentiniń basshysy Serik Áýbákirov órtti sóndirý kezinde bir adamnyń denesi tabylǵanyn habarlaǵan bolatyn. Artynsha Departamenttiń baspasóz qyzmeti Almaty polıseıleri azamattyń kim ekenin, onyń qalaı mert bolǵanyn anyqtap jatqanyn, ólim sebebin anyqtaý úshin birneshe saraptama taǵaıyndalǵanyn aıtty.
ALMATY