Saıası keńestiń aımaqtyq bıýrosynyń usynysmen Beısenbaı Tájibaev «Nur Otan» partııasy Túrkistan oblystyq fılıaly tóraǵasynyń birinshi orynbasary bolyp taǵaıyndaldy. Ol buǵan deıin Túrkistan oblystyq Ishki saıasat basqarmasynyń basshysy qyzmetin atqardy. Bul týraly partııanyń baspasóz qyzmeti habarlady.
Buǵan deıin «Nur Otan» partııasy Tóraǵasynyń Birinshi orynbasary Baýyrjan Baıbek elimizdiń birneshe oblystaryn aralap, onda jergilikti atqarýshy organ basshylarynyń partııalyq jaýapkershiligin kúsheıtý jáne barlyq deńgeıdegi máslıhattardaǵy depýtattyq fraksııalarynyń rólin arttyrý týraly birqatar máseleler talqylanǵan-dy. Onyń ishinde tez arada sheshimin tabýy tıis problemalyq obektiler jeke partııalyq baqylaýǵa alynǵan bolatyn.
Arys qalasyna jasaǵan is-saparynan soń Baýyrjan Baıbek óziniń Twitter-degi paraqshasynda partııaǵa «Nur Otan»-nyń Túrkistan oblystyq fılıaly birinshi orynbasarynyń ústinen kóptegen shaǵymdar túskenin jazdy.
– Fılıal tóraǵasymen kelise otyryp, bul máseleni Saıası keńestiń aımaqtyq bıýrosynda qarap, N.Joldasovty partııa qatarynan shyǵarýǵa deıin shara qoldaný kerek dep esepteımin. Jalpy, halyqtyń partııaǵa degen senimin arttyrý úshin partııalyq tártipti túbegeıli kúsheıtip, ishki «tazartý» jumystaryn júrgizý qajet», dedi ol.
Aıta ketý kerek, «Nur Otan» partııasynyń Lıderi Nursultan Nazarbaevtyń partııany «qaıta júkteý» jáne kadrlardy jańartý jónindegi tapsyrmasyna sáıkes, buǵan deıin Erlan Kanalımov Nur-Sultan qalasyndaǵy partııa fılıaly tóraǵasynyń birinshi orynbasary bolyp taǵaıyndalǵan bolatyn.