...rızashylyǵyn jetkizedi
Azamattarǵa alǵysymyz sheksiz
«Týǵan jer» baǵdarlamasyn júzege asyrý maqsatynda aıanbaı ter tógip júrgen abzal jandy azamattarymyz – Aqmola oblysy, Jaqsy aýdany, Jańa Qıma aýylynyń «Zolotaıa Nıva» JShS basshysy Baǵdat Áýbákirov jáne Qostanaı qalasynyń turǵyny Bazyl Jaqypovtar zor úlesin qosty deı alamyz. Jaqsy aýdany Terisaqqan aýylyndaǵy Baýbek batyr murajaıyn jańǵyrtýǵa jáne jańadan jıhazdar alýǵa Baǵdat Tólegenuly 325 myń teńge bóldi. Búgingi kúni Baýbek batyr murajaıy qalypty jaǵdaıda jumys istep tur.
О́zi týyp-ósken, ósip-óngen qasıetti týǵan jerin maqtan tutý – ár pendeniń paryzy hám mindeti dep bilemin. Osy mindetterdi oryndaý maqsatynda bizdiń jerlesimiz, Qostanaı qalasynyń turǵyny Bazyl Shamqanuly óziniń týyp-ósken jerin kórkeıtýge, Terisaqqan mektebine 999 myń teńge kóleminde qarajat bólip, oqýshylarǵa qysqy mezgilde hokkeı oınaıtyn kort, jaz mezgilinde fýtbol oınaıtyn alańdy jáne jaryqtandyrýdy qurýǵa atsalysty.
Mine, osyndaı isker azamattarymyzdyń eleýli eńbeginiń arqasynda elimizge, ásirese Terisaqqan jerine qosyp otyrǵan úlesteri óte súbeli. Bul kisiler basqaryp otyrǵan mekemelerine úlken jetistikter tileımiz, jasap jatqan jaqsylyqtary aldarynan eselep shyǵýyna Alla taǵalam násip etsin!
Shazızat ÝAISOVA
Aqmola oblysy,
Jaqsy aýdany
...oı qozǵaıdy
Shapannyń qadiri ketip barady
Qazir qazaqtyń qaı toıyna, qaı qýanyshyna bara qalsań – kóretiniń, jabyla shapan jabý jarysy der edim.
Meniń bilýimshe, qazaq shapandy óziniń asa syıly ári qadirli týǵan qudasynyń ǵana ıyǵyna japqan. Al qazir she, 40, 50, 60, 70, t.b. jasqa kelgenderge shapan jabý buljymaıtyn zańǵa aınalyp bara jatqandaı áser etedi.
Qaıtalap aıtamyn, qazaq shapandy óziniń týǵan qudasynyń ǵana ıyǵyna japqan. Al qazir qazaq shapanyn – qazaqty qoıyp, barsha musylmandarǵa da, barsha kápirlerge de, aǵylshyndarǵa da, qytaılarǵa da jaba beretin bolǵan. Tipti basqalardy aıtpaǵannyń ózinde, qazaq shapanyn kez kelgen jastaǵylarǵa da jaba beretin bolyppyz. Biz bul daraqylyqpen qazaq shapanynyń qadirin arttyryp emes, kerisinshe keri ketirip otyrmyz.
Qazaq shapandy asa áspettep, qurmet tutqan! Qasıetti qazaq shapanyn –dinimizdi, tilimizdi, ulttyq dástúrimizdi bilmeıtin, bilgisi de kelmeıtin, mensinbeıtin kim kóringen, qaıdaǵy bir kirmelerdiń ıyǵyna jaýyp, ne barqadam tappaqpyz?
Qoryta aıtqanda, qazaq shapanynyń qadirin ketirmeıik, «qalyń elim, qazaǵym, qaıran jurtym!..» (Abaı) – dep oıymdy túıindegim keledi.
Jumash KО́KBО́RI
...áserimen bólisedi
Ańshylyqtyń qyr-syry aıtyldy
Elbasynyń «Uly dalanyń jeti qyry» atty maqalasyna oraı Ushtaǵan aýylynda aýdandyq jastar resýrstyq ortalyǵynyń uıymdastyrýymen «Uly dalanyń jeti qyry jáne ańshylyq» atty kezdesý ótti.
Aýyl jastarymen kezdesý úshin ólkege belgili ańshy, aýdannyń Qurmetti azamaty Aldaberdi Aqshabaev arnaıy keldi. Kezdesýde jastar ańshyǵa óz saýaldaryn qoıyp, tushymdy jaýaptaryn aldy. Kezdesýdi jýrnalıst A.Qonarbaev júrgizip otyrdy.
Kezdesýde A.Aqshabaev ańshylyq pen onyń qyr-syry jaıynda jáne ań qaqpany, myltyqtary jaıynda jan-jaqty aıtyp berdi.
Aldaberdi Aqshabaev – ólkege tanymal aýylsharýashylyq qyzmetkeri, Lenın atyndaǵy sovhozda shopan, zootehnık, ferma meńgerýshisi bolyp eńbek etti. Túbektegi baıyrǵy ańshylardyń biri. Ataqty ańshy Nurdyń tikeleı shákirti.
«Men osy kúnge deıin qansha qasqyrdy aýlaǵanymdy bilmeımin, biraq sońǵy úsh jylda 100 qasqyrdy aýlap, qaqpanǵa túsirdim. Eń birinshi aýlaǵan ańym qaraquıryq. Ol kezde 4-synypta oqımyn. Ákem Atyraýǵa ketkende ózim Ushtaǵan aýyly mańynda qaraquıryq aýlap, ańǵa shyqqanym esimde. Jastardy ańshylyqpen shuǵyldanýǵa shaqyramyn. Elbasynyń «Uly dalanyń jeti qyry» atty maqalasynda ańshylyq degen arnaıy bólim bar, onyń ózi bizder úshin zor qoldaý degim keledi», deıdi A.Aqshabaev.
Aldash ShOŃAI
Mańǵystaý oblysy,
Mańǵystaý aýdany
...alǵys aıtady
Aqylshy abyzymyz
Ǵasyrǵa jýyq ómir keship otyrǵan Sapar Dúısenov – abyz aqsaqal. Jastarǵa aıtar ǵıbraty mol, keýdesi qazyna sandyq. Aqbas Alataý sekildi zańǵar bıikke adamdyqtyń asyl qasıetin kirletpeı, ardyń jibin attamaǵan kúıi adal jetti. Ákesi Dúısen óz zamanynda dinı saýatty, el-jurtyna syıly bolǵan.
Ekinshi dúnıejúzilik soǵysqa qatysqan jaýynger, búgingi ardager Almatyda tursa da, týǵan jeri Qyzyljarǵa at basyn jıi buryp turady. Ár kelgen saıyn sanaly ǵumyrynyń kóp bóligin ótkergen ystyq uıasy prokýratýraǵa soqpaı ketpeıdi. Túrli kezdesýlerden de bas tartqan emes. «Basymyzdan nebir qıly shaqtar ótti. Buǵanamyz qatpaı jatyp ot pen oqtyń ortasyna attandyq. Aman-esen elge oralǵan soń túrli jaýapty qyzmetter atqardyq. Táýelsizdiktiń araıly tańynyń kýágeri bolǵanyma shúkirshilik etemin», deıdi Sapar aqsaqal.
Abyz aqsaqaldyń bar tileýi – eldiń tynyshtyǵy, halyqtyń amandyǵy. Odan asqan baqyt ta, baılyq ta joq dep esepteıdi. Jas býyn táýelsizdigimizdiń qadirin bilip, ata-babamyz amanat etken ulan-baıtaq el men jerdiń ıesi, qojasy bola bilse degen tilekte.
Azamatty isinen tany, degen jazylmaǵan qaǵıda bar. Eńbek jolyn tergeýshilikten bastap, oblys prokýrorynyń orynbasary qyzmetine deıin kóterilgen qarııanyń ómirden túıgeni mol, keıingi urpaqqa aıtary kóp. El-jurtyna jasaǵan jaqsylyǵyn qansha sanamalasaq ta taýysý qıyn. Týǵan aýyly Taýaǵashqa ekiqabatty mektep úıin saldyrtyp berýiniń ózi nege turady. Tabanynan taýsylyp júrip, daryndy balalarǵa mamandandyrylǵan qazaq mektep-ınternaty janyna Á.Dosmuhambetovtyń eskertkishin turǵyzýǵa uıytqy boldy. Jasynyń shaý tartqanyna qaramastan naǵashysy jerlengen Ýkraınadaǵy baýyrlastar zıratyna baryp, taǵzym etip qaıtty.
Aıgúl YSQAQOVA
Soltústik Qazaqstan oblysy