Bıyl Qaraǵandy oblysynda 25 myń búldirshin mektep tabaldyryǵyn tuńǵysh ret attaıdy. Birinshi synyp partasyna otyratyndardyń 812-i bes jastaǵy balalar.
Taıaýda oblystyq ákimdikte ótken apparat jıynynda bilim basqarmasynyń basshysy Esenǵazy Imanǵalıev jańa oqý jylynda óńirdegi birinshi synyp balalarynyń oqýlyqtarmen tegin qamtamasyz etiletinin málimdedi.
Sondaı-aq, 1-shi jáne 4-synyp oqýshylaryna barlyq pánder boıynsha jumys dápterleri, 2-shi jáne 3-synyp oqýshylaryna aǵylshyn tili men ózin-ózi taný boıynsha jumys dápterleri taratylady.
Sonymen qatar, qanatqaqty joba aıasyndaǵy mektepterdiń oqýshylary ınformatıka, hımııa, fızıka jáne bıologııa pánderinen eki tilde jazylǵan oqýlyqtarmen qamtylady. Túzetý mektepteriniń oqýshylaryna 2-shi, 5-shi jáne 7-synyptarǵa arnalǵan oqýlyqtar tegin beriledi.
Esenǵazy Imanǵalıevtiń aıtýynsha, bıyl oblysta 186 bilim berý mekemesine jóndeý júrgizilgen, onyń ishinde 143 mektep, 18 balabaqsha, alty ınternat jáne úsh kolledj bar.
Ortalyq jylý júıesi joq mektepter 15 qyrkúıekke deıin kómirmen tolyq qamtamasyz etilýi tıis. Qazirgi tańda qysqy kómir qory 62,5 myń tonnany quraıdy, ol jalpy qajettiliktiń 56%-y.
1 qyrkúıek kúni óńirde eki jańa mektep ashylady: onyń biri Qaraǵandy qalasyndaǵy Panel-ortalyq shaǵyn aýdanynda boı kótergen 1200 oryndyq mektep bolsa, ekinshisi Temirtaýda 600 oqýshyǵa laıyqtalyp salynǵan jańa bilim berý oshaǵy.
Aıta ketý kerek, Qaraǵandy oblysynda barlyǵy 509 mektep pen 540 mektepke deıingi mekeme jumys isteıdi.
Qaraǵandy oblysy