Keshe Qazaqstannyń tabıǵaty ásem, tarıhy taǵylymdy qasıetti jerleri men respýblıka aımaqtarynyń rýhanı-mádenı murasymen tanysýdy maqsat tutqan 700-ge jýyq jas óren «JASTAR KERÝENI» jobasynyń aıasynda 7 baǵyt boıynsha týrıstik saıahatqa attandy. Osyǵan oraı elimizdiń túkpir-túkpirinen jınalǵan belsendi jastar elorda tórinde bas qosyp, Esil ózeni jaǵalaýyndaǵy «Amfıteatr» sahnasynda aıtýly sharanyń ashylý saltanatyna arnalǵan slet ótkizdi.
Qazaqstan jastar kongresi Aqparat jáne qoǵamdyq damý mınıstrliginiń qoldaýymen Jastar jyly jáne «Azamattyq bastamalardy qoldaý ortalyǵy» KEAQ memlekettik granty aıasynda ótkizgen sletke respýblıkanyń barlyq aımaǵynan 16-29 jas aralyǵyndaǵy daryndy jastar qatysty.
– Bul jobany qolǵa alýymyzdyń basty sebebi – otandyq ishki týrızmdi damytý jáne jastardy týǵan jerin súıýge baýlý, sol arqyly ulttyq patrıotızmdi qalyptastyrý. О́ıtkeni búgingi óskeleń urpaq elimizdiń qasıetti jerleriniń kóz tartarlyq sulýlyǵyn bylaı qoıǵanda, tarıhı máni men taǵylymyn da jete bile bermeıdi. Onyń túrli sebebi bolýy múmkin. Ásirese nasıhat jumysynyń azdyǵy. Osyǵan oraı bir top belsendi jasty qatarymyzǵa tartyp, Nur-Sultan qalasynan Oral, Shymkent, Almaty oblysy, О́skemen (Shyǵys Qazaqstan oblysy), Aqtóbe, Pavlodar, Qaraǵandy – barlyǵy 7 baǵyt boıynsha arnaıy baǵdarmen týrıstik saıahat jasaýdy kózdep otyrmyz. Bizdi qýantqany – týǵan eldiń tabıǵaty men qasıetti jerlerin tanýǵa degen jastarymyzdyń belsendiligi óte joǵary eken. «JASTAR KERÝENI» jobasyna 1500-den astam jastan ótinish kelip tústi. Onyń ishinen 680 qatysýshy arnaıy komıssııa músheleriniń tóreligimen tańdalyp, saparǵa joldama aldy. Aıtýly jobada, ásirese jýrnalıster men blogerlerge basymdyq berdik. Sapardan oralǵan soń jastardyń kórgeni men bilgeni, kóńilge túıgeni BAQ-ta keńinen jarııalanyp, Otanymyzdyń qasıetti jerleri jan-jaqty nasıhattalatyn bolady, – deıdi Qazaqstan jastar kongresiniń atqarýshy dırektory Toqtar Bolysov.
Barlyǵy 3000-nan astam adam qatysqan aıtýly kesh qatysýshy qonaqtar sanynyń aýqymdylyǵymen ǵana emes, baǵdarlamalyq mazmunynyń jarqyndyǵymen de este qaldy. Keshki astanany án men jyrǵa bólep, erke Esilge qosyla án shyrqap, tamasha bıden shashý shashqan Raim&Artur, Mıras Júginisov, zamanaýı rep-ánshi – Rick0407, DJ Angel bastaǵan ónerpazdar ónerine jastar qýana qol soǵyp, qosyla bıledi. Sonymen qatar kesh baǵdarlamasyna engen teatr jáne mýzykalyq qoıylymdar, neondyq shoý da óz órnegimen kópshilik esinde qaldy. Kezdesýdiń sońy Abaı Qunanbaevtyń 175 jyldyǵyna arnalǵan eń aýqymdy chellendjdi túsirýmen aıaqtaldy. 700-den astam belsendi jas hakim Abaıdyń «Ǵylym tappaı maqtanba» óleńin jatqa aıtý arqyly uly aqyn ónerine taǵzym etti.
Joba uıymdastyrýshylary atap ótkendeı, tól tarıhyn taný eń áýeli adamnyń ózinen bastalýy kerek. Sonda ǵana qazaqtyń kósegesi kógermek. Olaı deıtinimiz, týǵan jer taǵylymyn tanyp, ulaǵatyn uǵyp ósken azamat erteń Otan úshin aıanbaı ter tógip, qazaqqa qaltqysyz qyzmet eteri sózsiz. Endeshe, tól tarıhyn tanýǵa attanǵan jastarǵa sát sapar deımiz!