Mektepke 6 jastan barý mindetti emes

Qazir Bilim jáne ǵylym mınıstrligi jergilikti atqarýshy organdarmen birlesip, jańa oqý jylyna daıyndyq jumystaryn júrgizýde. Bıyl respýblıka boıynsha mektepke baratyn balalardyń sany 3 mln-nan asady. Onyń ishinde 1-synypqa 405 myńnan astam bala barady dep kútilýde. Bul kórsetkish ótken jylmen salystyrǵanda 20 myń balaǵa artyq. Bilim jáne ǵylym mınıstri Ashat Aımaǵambetovtiń aıtýynsha, mektepke balalardy 6 jastan berý mindetti emes. Qaı jasta beremiz dese de, tańdaý ata-ananyń óz erkinde bolmaq.

− Balalary 6 jasqa tolǵan kóptegen ata-ana mektepke da­ıyn­dyǵymyz joq, sanaý bilmeımiz, oqı almaımyz dep shaǵym aıtyp jatady. Eshqandaı mektepte 1-synypqa barǵan bala mindetti túrde oqyp, jazyp, sanaı bilýi ke­rek degen talap joq. Mektep tabaldyryǵyn attaǵan balany oqytyp, úıretetin arnaıy baǵ­darlama bar. Sondyqtan birinshi synypta olar áripterdi, sanaý­dy, jazýdy, oqýdy úırenedi, − dedi mınıstr. Onyń aıtýynsha, balasy 6 jastan mektepke bar­maǵany úshin ata-ana memleketke aıyppul tólemeıdi, bul – árkimniń óz tańdaýy. Ata-ana balasynyń qa­biletin bilgendikten, ony qansha jastan mek­tepke berý kerektigin ózi sheshe­di.

Sonymen qatar A.Aıma­ǵam­betov qazaqstandyq mektepterde erekshe bilim alý qajettilikteri bar balalar 8 jasynda da mektepke qabyldanatynyn eske saldy. BAQ ókilderimen kezdesý barysynda mınıstr oqýshylardyń elektrondy oqýlyqtardy qol­dana alatynyn, kitaptardy QR kodtar boıynsha júkteı alatynyn jáne mektepke planshetpen, elektrondy kitappen nemese noýt­býkpen bara alatynyn aıtty. Soǵan saı atalǵan vedomstvo óńirlerge arnaıy nusqaý hat daıyndaǵan.

− Menen elektrondy oqý­lyq­tardy paıdalanýǵa muǵalimder ruqsat bere me dep suraıdy. Biz oqý jylynyń basyna arnalǵan nusqaýlyq-ádistemelik hatta osy jaǵdaıdy oqýshynyń jeke tań­daýy ekenin túsindirdik. Elektrondy oqýlyqtyń qara­pa­ıym oqýlyqtan esh aıyr­ma­shy­lyǵy joq. Mektepke balalar planshetpen, elektrondy kitap­pen, noýtbýkpen bara alady, basqa da qurylǵylardy qoldanýǵa bolady. Bul proseske qatań talaptar qoıylmaǵan, – dep túsindirdi A.Aımaǵambetov. Mı­nıstr elektrondy oqýlyq  mek­tep oqýshylarynyń sóm­kesin jeńildetýge arnalǵan múm­kin­dikterdiń biri ekenin aıtty.