Aqtaýdaǵy «Zhamal-ai LTD» jaýapkershiligi shekteýli seriktestigi jıyrma bes jyldan astam ýaqyt tynbaı jumys istep keledi. Shırek ǵasyr ishinde ózindik baǵyt-baǵdaryn qalyptastyryp, tájirıbesin tolyqtyrǵan seriktestik otandyq naryqta ózin tek úzdik jaǵynan kórsetip júr.
Munaıshylarǵa, áskerı kúsh qurylymdaryna, quqyq qorǵaýshylarǵa, medısına qyzmetkerlerine arnaıy kıimder, lıseı oqýshylary úshin mektep formasyn tigýmen qatar, jumysshy kıimi men aıaq kıimderin óndiretin kásiporyn endi halyqqa arnalǵan kúndelikti aıaq kıim shyǵarýǵa kiristi.
Sapaly ónimimen, joǵary ujymdyq uıymdastyrýshylyq ereksheligimen jeńil ónerkásip salasynda birneshe ret qalalyq, oblystyq jáne respýblıkalyq kórmelerdiń júldegeri atanǵan kásiporynda 160 adam eńbek etedi. Sehtary zamanaýı joǵary tehnologııalyq jabdyqtarmen qamtamasyz etilgen kásiporynǵa óndiristi keńeıtý maqsatynda 2017 jyly 100% maqtadan jasalǵan kıimder tigý tehnologııasy engizildi. Polo jeıdeleri, uzyn jáne qysqa jeńdi fýtbolkalar, balalar polosy, balalar sport kıimi osy sanatqa jatady. Qazirgi ýaqytta naryqtaǵy barlyq ónim tutynýshylardyń úlken suranysyna ıe.
«Zhamal-ai LTD» jaýapkershiligi shekteýli seriktestigi dırektory Zıbıra Hasanovanyń aıtýynsha, kásiporyn jylyna 19 myń dana arnaıy kıim, 100 myń jup arnaıy aıaq kıim men 30 myń jup makasın daıyndaıdy. Keıbir aıaq kıimderdiń tabany osynda quıylady. Shıkizattar Reseı men Italııa, Túrkııadan jetkizilýde. Kásiporynnyń «Sharkey» brendi – sándi, ádemi jáne joǵary sapaly bylǵarydan jasalǵan aıaq kıim. Barlyq otbasyna, ıaǵnı er adam, áıel, balalarǵa arnalǵan aıaq kıimder sapasy jaǵynan jaqsy tanylǵan otandyq ónim sanatynda. Sapaly ónimder Aqtaý men Jańaózen qalalarynda saýdalanýda, sondaı-aq Astana men Almaty qalalarynda saýda núkteleri bar.
О́nim óndirýde ózindik órnegin qalyptastyrǵan «Zhamal-ai LTD» seriktestigi jeńil ónerkásip pen jıhaz jasaýshylar arasynan Mańǵystaýda alǵashqy bolyp ındýstrııalyq sertıfıkatqa ıe boldy. Indýstrııalyq sertıfıkat memlekettik satyp alýǵa qatysýǵa, otandyq taýarlardy, jumystar men qyzmetterdi shetelde kórsetý boıynsha shyǵyndardy óteýge ruqsat beredi. «Buǵan deıin óndiris oshaǵy ST KZ sertıfıkatymen ónim shyǵaryp keldi. Jańa sertıfıkatty alý úshin tıisti dáleldi qujattar jınaqtaldy. О́ndiris ǵımaratyn, óndiris qarqyndylyǵyn, otandyq ónim óndirý shynaıylyǵyn, tehnıkalardy arnaıy komıssııa tekserdi. Talaptarǵa saı kelgendikten atalǵan sertıfıkatty alǵash osy kásiporynǵa berýge sheshim qabyldandy», deıdi sertıfıkattaý jónindegi ınjener Bolat Dúısekeshev.
Mańǵystaý oblysy kásipkerler palatasynyń sertıfıkattaý jónindegi 1-sanatty mamany Ashat Ysqaqovtyń aıtýynsha, «Zhamal-ai LTD» seriktestigi 268 taýar túrine arnalǵan ındýstrııalyq sertıfıkatqa ıe.
Atyraýdan óz núktelerin ashýdy josparlap otyrǵan seriktestik kúzde Máskeýde ótetin kórmege qatysyp, halyqaralyq naryqqa jol salmaq. «Qazaqstanda jasalǵan» tańbasymen otandyq taýarlardyń eksport aıasyn keńeıtýdi maqsat etken kásiporynnyń taýarlary talǵamǵa tatıtyny anyq.
Mańǵystaý oblysy