Qazaqstandyq «Nık Výıchıch» atanǵan Álı Turǵanbekov óz qolymen aǵylshynnyń Lıverpýl oıynshylaryna ÝEFA Sýperkýbogyn tabystady, dep habarlaıdy QazAqparat tilshisi.
Álı jeńimpazdarǵa kýbokty tabystaý rásimin ÝEFA prezıdenti Aleksander Cheferınmen birge ótkizdi. Fınalda «Lıverpýl» óziniń «chelsılik» otandastaryn penaltı qorytyndysy boıynsha jeńgen bolatyn.
Eki aıaqsyz dúnıege kelgen Álı Turǵanbekov «Chelsı» jáne «Lıverpýl» fýtbol komandalarynyń juldyzdarymen kezdesetini buǵan deıin habarlanǵan bolatyn. «Dostar, men ÝEFA-nyń Sýperkýbogyna shaqyrtý aldym. Onda Chempıondar lıgasy men Eýropa lıgasynyń ótken maýsymdaǵy jeńimpazdary - «Lıverpýl» men «Chelsı» kezdesedi. Qýanyshymda shek joq», - dep bólisken edi Álı óz qýanyshymen Instagram-daǵy paraqshasynda.
«Lıverpýl» jańa eýromaýsymdy ashar matchyn «Chelsımen» Ystanbulda oınady. Túrik jurtyna baryp qaıtqansha Álıdiń paraqshasy Muhammed Salah, Roberto Fırmıno sekildi juldyzdarmen, komandanyń bas bapkeri Iýrgen Kloppen túsken sýrettermen toldy.
Álı tipti áıgili fýtbol juldyzy Lıonel Messımen de kezdesip, fotosýretke túsken. Oǵan deıin Álıdi fransýzdyń «Parı-Sen-Jermen» komandasynyń juldyzdary Kıllıan Mbappe, Edınson Kavanı men Neımar shaqyrǵan edi. Al 2017 jyldyń jeltoqsan aıynda Álı óziniń kýmıri Nık Výıchıchpen júzdesken bolatyn.
Aıta ketsek, 2017 jyldyń qyrkúıek aıynda Álı men anasy Aqmaral QazAqparat tilshisine suhbat berip, otbasylarynyń soqpaq joldy basyp ótkenin aıtyp bergen bolatyn. Dúnıege kelgen kezinde onyń anasyna tipti týystary baladan bas tartýyn aıtyp, úgittegen. Álı ósken kezde tipti eshbir mektep ony qabyldaǵysy kelmepti. Aqyry, osy qıyndyqtardyń bárin basyp ótken bala elordadaǵy «Nur Orda» mektebine túsip, kúni búginge deıin sol bilim shańyraǵynda oqýyn jalǵastyryp jatyr.