«Oı tústeri». Birimen-biri jymdasyp, ıyqtasa qatar órilgen túrli túster galereıasy beınelengen kartına osylaı atalady. Jalpy keskini quraq kórpeni eske túsirgen sýret ataýyna qarap, eriksiz oıǵa batasyń. Adamnyń bir sátte myń san tarapqa qubylatyn oıyn bireý kórkem sózben jetkizse, endi bireý boıaýly túspen aıshyqtaıdy.
Oıdyń qaı kezde qandaı túske boıalyp jatqanyn árkimniń óz ishi ǵana bilse kerek. Avtor da óz boıynan baıqaǵan oı qubylystaryn salyp otyr. Qyzyǵy sol, kartınaǵa qarap, túrli boıaýdyń arasynan sol sáttegi óz oı-túsińdi, óz kúıińdi izdeıdi ekensiń.
Ulttyq akademııalyq kitaphanadaǵy biz tamashalaǵan belgili qylqalam sheberi Rýslan Aqanaevtyń jeke kórmesi 7 shildede ashylǵan bolatyn. Munda sheberdiń sońǵy jyldary salynǵan jumystary qoıylǵan. Atalmysh kórme Mádenıet jáne sport mınıstrliginiń qoldaýymen «Rýhanı jańǵyrý» baǵdarlamasy aıasynda óskeleń urpaqqa sýret ónerin nasıhattaý maqsatynda ótip otyr.
R.Aqanaevtyń jumystary «Shyǵystyq galereıa» (Máskeý qalasy), «Alys álemder» (Vashıngton qalasy), «Has Sanat» (Astana qalasy), «Trıbýna» (Almaty qalasy) galereıalarynda qoıylǵan. Reseı, Germanııa, Fransııa, Amerıka, Kanada, Qazaqstan, Lıhtenshteın men Shveısarııada jeke kolleksııalarda saqtaýly.
Kórmedegi nazarǵa iligip, kóńilge qozǵaý salǵan «Oı tústeri» kartınasy haqynda avtordyń ózinen syr tartyp, blıs-suhbat jasaǵan edik.
– «Oı tústeri» dep ózińiz atadyńyz ba? Sebebi nede?
– Shyǵarma taqyrybyn ózim qoıdym. Maǵan kórinbeıtin energııalardy beınelegen unaıdy. Osy sekildi «Tynyshtyq dybysy», «Jupar túsi», t.b. kartınalarym bar.
– Sýretti salýǵa kóp ýaqytyńyz ketti me?
– Bir aıdaı ýaqyt jumsadym.
– «Oı tústerinde» qansha tús qoldandyńyz?
– Barlyq tústi paıdalandym desem bolady.
– Qaı tús basym?
– Men kóbine kók pen kúlgin tústi jıi qoldanamyn. Munda da solaı.
– Salý ústinde qandaı kóńil kúıde boldyńyz? Onyń kartınaǵa áseri boldy ma?
– Kóńil kúıim medıatıvti boldy. Áıtpese mundaı kartınany salý óte qıyn bolar edi.
– Kartınada qara tús nege joq?
– Qara tús bolsa, «О́mir tústeri» dep atar edim.
– Adam oıynyń túrli kúılerin túspen beıneleý ıdeıasy qalaı týdy?
– О́z oılarymdy baqylap júrdim. Iаǵnı ózime eksperıment jasadym. Baıqaǵanymdy tústermen jetkizgim keldi.
– Nege «ómir tústeri» emes, «oı tústeri»?
– О́ıtkeni ómir oıdan bastalady.
– Álemdik arenada kimniń kartınasyn erekshe baǵalaısyz?
– Leonardo da Vınchıdiń barlyq shyǵarmasy unaıdy.
– Áńgimeńizge rahmet.