1 shildedegi málimetter boıynsha Qazaqstanda 690 myń múgedektigi bar adam turady, onyń 61,5% (424,4 myń adam) eńbekke qabiletti jastaǵy adamdarǵa, 25,6% (176,8 myń adam) - zeınetkerlik jastaǵy adamdarǵa, 12,9% (89,3 myń adam) - 18 jasqa deıingi balalarǵa tıesili. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady.
Búginde Qazaqstanda múgedektigi bar adamdarǵa arnalǵan ońaltý quraldary men qyzmetteri memlekettik satyp alý arqyly usynylady. Qyzmet alýshylar tenderlik júıe múgedekterge múldem sáıkes kelmeıtindigine, jyl saıyn qyzmet kórsetý sapasy men medısınalyq buıymdardyń nasharlaýyna shaǵymdanady.
Bul máseleni sheshý úshin Eńbek jáne halyqty áleýmettik qorǵaý mınıstrligi Áleýmettik qyzmetter portalyn engizýde. Bul fýnksıonal pılottyq rejımde Aqtóbe qalasynyń turǵyndary úshin jumys isteıdi, onda 3 medısınalyq-áleýmettik mekeme (budan ári - MÁM) qosylǵan. Osylaısha, onlaın rejımde 2 adam MÁM-de turýǵa ótinim berdi.
«Áleýmettik qyzmetter portalynyń kómegimen biz ulymyzdy múmkindigi shekteýli balalarǵa arnalǵan saýyqtyrý stasıonaryna ornalastyra aldyq. Portal óte yńǵaıly: biz ótinim berip, oǵan ESQ qol qoıdyq. Onyń ústine, ýaqytty únemdedik», - dedi qyzmet alýshy Ǵabıt Júketaev.
Sonymen birge, áleýmettik qyzmetter portalyn jetildirý jumystary jalǵasýda. Portaldy damytýdyń ekinshi kezeńi azamattardyń tehnıkalyq ońaltý quraldaryn alý múmkindigi bolady. Aqtóbe qalasyndaǵy jańashyldyq testileýden sátti ótken jaǵdaıda ony respýblıkanyń basqa óńirlerinde kezeń-kezeńimen engizý josparlanýda.
Vedomstvoda áleýmettik qyzmetter bólimin engizý múmkindigi shekteýli azamattarǵa jeke qajettilikterdi eskere otyryp, quraldar men ońaltý qyzmetterin derbes tańdaýǵa múmkindik beredi, al olardy alý ýaqyty memlekettik satyp alý rásimderin alyp tastaǵanda qysqarady dep habarlaıdy.
Bul úshin «Memlekettik satyp alý týraly», «Qazaqstan Respýblıkasynda múgedekterdi áleýmettik qorǵaý týraly» jáne «Kásipkerlik kodeks týraly» Qazaqstan Respýblıkasynyń zańdaryna qajetti ózgerister engizý josparlanyp otyr.