Álekeń – Álısultan Qulanbaıdyń ómirden ótkenine de bir jyl bolyp qalypty. Jymııa kúlip janymyzda júrgeni kúni keshe ǵana sııaqty edi – zymyraǵan ýaqyt. Al onyń aıaq astynan bolǵan qazasy úı-ishi, jaqyn-týystarymen qatar, «Egemendegi» qanattas úlken-kishi áriptesteriniń de qabyrǵasyn qaıystyrdy. Jany jaısań aptaldaı azamattan tosynnan aıyrylyp qalý kimge de bolsa aýyr tıip edi.
Alǵash tanystyǵymyz Álekeńniń sonaý 1996 jyly «Egemenge» qyzmetke kelgen kezinde bastaldy. Oǵan deıin syrttaı sálemimiz túzý bolǵanymen, jaqyn aralastyǵymyz joq edi. Kóp ýaqyt ótpeı áńgimemiz jarasyp bir-birimizdi jaqyn tarta bastadyq. Oǵan aramyzdaǵy alty jas aıyrmashylyq ta keri áser ete qoıǵan joq, quddy bir qurdas sııaqty edik. Bir kúni otbasymyzben aralasaıyq degen usynys jasady. Qyzmettes áriptesterdiń bári birdeı úı-ishimen aralasyp jatpaıtyny belgili. Bul ekeýmizdiń aramyzdaǵy ózara túsinistiktiń, syılastyqtyń, jan dúnıemizdiń jaqyndyǵynyń nátıjesi ekeni anyq-tyn.
Jumysta da óte syıly boldy. Úlken de, kishi de Álekeń deıtin. О́zi de sondaı qurmetke laıyqty edi. Aǵany aǵa dep, inini ini dep syılaıtyn. О́zinen bar-joǵy bir jarym jastaı ǵana úlkendigi bar Súleımen Mámet áriptesimizdi de bar yqylasymen «aǵa» deýden tanǵan joq. Bireýmen jaǵa jyrtyspaq túgili, daýys kóterip sóılegenin kórgen de, estigen de emespiz. Turmysta bolsyn, jumysta bolsyn kezdesetin qandaı da bir kúrdeli máseleni ózine tán sabyrly qalpymen sheshýge tyrysatyn. Oryndy-orynsyz bireýge renish bildirip jatqan kezin de baıqamappyz.
Osyndaıda eske túsedi. «Egemen» elordaǵa kóship kelgennen kóp ýaqyt ótpeı, basylymnyń sol kezdegi Aqmola oblysy boıynsha menshikti tilshisi Baqbergen Amalbekpen birge sonyń kóligimen óńirge issaparǵa attanyp bara jatqanda jolaı jol-kólik oqıǵasyna ushyrap, qudaı saqtap jeńil jaraqat alyp keri oralǵan kezinde de bireýdi kinálap, keıistik bildirgenin kórmedik. Bir aptadan soń sol sabyrly qalpynda jyly jymıyp jumys ornyna kelip edi.
Álekeń eńbekqor edi. Redaksııa tarapynan beriletin qandaı tapsyrmany da tap-tuınaqtaı etip ýaqtyly oryndaıtyn. Sabyrly minezine saı eshqashan asyǵyp-aptyqpaıtyn, biraq maqalasyn nemese túrli jınalystardan jazylatyn esepterdi, oqıǵa oryndarynan jazylatyn reportajdardy ýaqytynan keshiktirmeıtin. Aıtpaqshy, ol kompıýter tilin meńgermeı ketti. Úırene almady ma, úırengisi kelmedi me, ony qazbalap suramaıtyn edik. Maqalalaryn aq qaǵazǵa kók sııamen marjandaı etip túsiretin. Sóıtip terimshi qyzdardyń qyzmetine júginetin.
Qol tıgizbeıtindeı etip sapaly jazatyn. Zerttegen taqyrybyn ıleýin qandyrmaı jarııalaýǵa usynbaıtyn naǵyz kásibı maman edi. Ol osyndaı naǵyz jýrnalıske tán qasıetteriniń arqasynda elimizdiń joǵary bılik ókilderiniń resmı saparlaryn aqparattyq qoldaý úshin jıi-jıi shetelderge issaparlarǵa jiberilip turdy. Onyń maıyn tamyzyp jazǵan eseptik materıaldary murty buzylmastan gazet betine top etip túse qalatyn, eshkim túzep, kúzep áýre bolmaıtyn. Sóıtip redaksııadaǵylar ýaqyt jaǵynan da utysqa shyǵyp jatatyn.
Álekeńniń dostyqqa adaldyǵyn, sózine beriktigin, ózindik buljymaıtyn qaǵıdatty kózqarasy bolǵandyǵyn da atap kórsetken jón. О́mirdi túsine biletin. Onyki keıbireýlerdiki sekildi «qashanda meniki jón» deıtin qyńyr-qısyq ustanym emes edi. О́mirge túzý kózben qaraıtyn jáne kózqarasynan aınymaıtyn. Talaı birge júrgende bireýdiń syrtynan ǵaıbat sóz aıtqanyn da qulaǵymyz shalmapty. Mundaı ońdy qasıettiń júregi aq azamatqa ǵana tán bolatyny túsinikti. Aıtary da bar edi, aıtary joq adamnan jaqsy maman shyqpaıtyny belgili jaıt. Álısultan Qulanbaı óz isiniń maıtalman mamany bolatyn.
Týǵan jerine árqashan janashyrlyqpen qaraıtyn. Aýylyndaǵy túıtkildi jaǵdaılar janyn aýyrtyp, mazalaıtynyna talaı kýá de boldyq. Solardyń oń sheshilýine qolynan kelgeninshe úles qossam deıtin. Sol sebepti gazetimizde birneshe syn maqala jazǵany bar. Jazǵandarynan nátıje shyǵyp jatsa, balasha qýanatyn.
Úlgili otaǵasy bolǵanynan attap ketsek, ol da oǵan jasalǵan qııanat bolar edi. Úıinde árqashan jylylyqtyń lebi esip turatyn. Jary Kerimjan ekeýi sózben emes, kózben uǵynysatyn. Balalaryn da janyndaı jaqsy kórdi. Ásirese uly Bekjandy qatty erkeletti. Qyzdary Jadyra men Ǵalııabanýdan da eshteńesin aıap kórgen emes. Ornynda bar ońalar degen, búginde uly erjetti, qyzdary boıjetti. Balalarynyń toılaryn elordanyń tórinde barlyq aǵaıyn-týmasyn, áriptesterin, dos-jarandaryn shaqyryp dúrkiretip ótkizdi. Sóıtip ákelik paryzyn oryndady.
Jadyrasy redaksııaǵa jaqyn mańda turdy. «Qyzym túski asty úıden iship ketińiz dep shaqyryp jatyr», dep qyzynyń úıine qaraı marqaıyp ketip bara jatatyn...
Álısultan Qulanbaı qandaı jaqsy sóz arnasa da soǵan laıyqty azamat edi. Jatqan jeri jaryq bolyp, janyna jánnattan oryn tısin, nury peıishte shalqysyn deımiz. Álekeńdi biletinderdiń esinde jany jaısań, eńbekqor, mamandyǵyna adal, jumysyna berilgen, úlkenge laıyqty ini, kishige qurmetti aǵa bola bilgen azamat retinde saqtalatyny kúmánsiz.