Almaty ult rýhanııatyn ulyqtaǵan talaı marǵasqalardy qanattandyrǵan mádenıet pen ádebıettiń qara shańyraǵy. Syrly sóz ben sulý ónerdiń kórigin qyzdyrǵan zııaly qaýym ókilderiniń kópshiligi azattyqtyń altyn besigine balanatyn dáp osy Almatyda shoǵyrlanǵan. Jańa qyzmetine kiriskenine kóp bola qoımaǵan qala ákimi Baqytjan Saǵyntaev Qazaqstan Jazýshylar Odaǵynyń qabyrǵasynda qalamgerler qaýymymen kezdesti.
Ústimizdegi jyly Qazaqstan Jazýshylar Odaǵynyń qurylǵanyna 85 jyl tolady. Qazaq ádebıetiniń qara shańyraǵyna balanatyn irgeli ujymnyń dara turar datasyna oraı qala ákimdigi tarapynan úlken qoldaý kórsetiletinin jetkizgen Baqytjan Saǵyntaev, alyptardyń izi qalǵan qasterli ǵımaratty jóndeý úshin bıyl jergilikti bıýdjetten 250 mln teńge qarjy bólinetinin aıtty.
– Almaty qalasynyń ákimi bolyp taǵaıyndalǵan kúnnen bastap elimizdiń mádenı astanasy bolyp sanalatyn qalamyzdyń rýhanı tynys-tirshiligin baqylaýda ustap otyrmyn. Zańǵar jazýshymyz Ǵabıt Músirepov aıtqandaı, «Ádebıeti uly bolmaı, ult uly bolmaıdy». Sondyqtan shyǵarmashylyqpen aınalysatyn tulǵalaryna udaıy nazar aýdaryp, tıisti jaǵdaı jasaý - óser eldiń belgisi. Qazaqstan Jazýshylar Odaǵynyń 85 jyldyq mereıtoıy laıyqty deńgeıde ótýine ákimshilik múmkindiginshe qoldaý kórsetedi. Ádebıet ordasynyń 85 jyldyq tarıhynan syr shertetin «Ádebı ómir shejiresi» jáne «Qazaqstan jazýshylary anyqtamalyǵy» atty kitaptardyń jaryqqa shyǵýyna da ákimdik tarapynan qoldaý kórsetiletin bolady. Jazýshylar odaǵy tarapynan myń jyldyq tarıhtan tamyr tartatyn el jastarynyń rýhanı astanasy Almaty qalasynyń tereń tarıhyn tanytyp, kópshilikke dáripteý maqsatynda 2020 jyly qalamyzda halyqaralyq deńgeıde «Almaty – elimizdiń órkenıet ordasy» atty ádebı-janrlyq baıqaý ótkizý týraly usynys túsken bolatyn. Osy bir tárbıelik, tanymdyq máni zor sharany ózderińizben birlese otyryp joǵary deńgeıde ótkizý úshin qajetti qarjy bólý máselesin qarastyramyz. Kelisip pishken ton kelte bolmaıdy», - deıdi dana halqymyz. Osy qyzmetke kelgennen keıingi arnaıy kezdesýlerimniń alǵashqylarynyń biri ózderińizben ótip otyr. Mádenıet pen rýhanııattyń damýy – meniń ákim retinde kún tártibimnen túspeıtin basty máselelerdiń biri. Osyǵan oraı qalamyzda jazýshylarǵa qatysty qolǵa alǵan jáne alda atqarmaq josparlarymyz jónindegi oılarymdy ózderińizben bólisýdi jón kórip otyrmyn, – dedi Baqytjan Saǵyntaev.
Shahar basshysy budan bólek Jazýshylar odaǵyna qarasty «Qazaq ádebıeti» basylymynyń búgingi qıyn materıaldyq jaǵdaıyn eskere otyryp, ákimdik tarapynan mereıtoılyq jylda gazetke qarjylyq kómek kórsetiletinin, Qazaqstan Jazýshylar odaǵynyń 85 jyldyq mereıtoıy aıasynda Almatyda eńbek etip, ómirsheń shyǵarmalaryn dúnıege ákelgen jáne búgingi tańda da el rýhanııatynyń damýyna ólsheýsiz úles qosyp júrgen sóz zergerleriniń ómiri men shyǵarmashylyǵy týraly áleýmettik-tanymdyq beınerolıkter sıklyn shyǵarý týraly «Almaty» telearnasyna tapsyrma bergenin aıtty.
Aqyn-jazýshylardyń, onyń ishinde jas qalamgerlerdiń shyǵarmashylyq umtylysyn arttyrý maqsatynda bıylǵy tamyz aıynan bastap ákimdik aqyn-jazýshylarǵa arnalǵan grant bóletinin, bul grantqa úmitkerlerdi anyqtaý ashyq túrde jáne Jazýshylar Odaǵy ujymymen tikeleı aqyldasa otyryp júzege asyrylatynyn jetkizdi. Sondaı-aq «Rýhanı jańǵyrý» baǵdarlamasy men Elbasy–Tuńǵysh Prezıdent N.Á.Nazarbaevtyń «Uly Dalanyń jeti qyry» baǵdarlamalyq maqalasy negizinde teatrlarǵa arnalǵan ssenarııler baıqaýyn ótkizýdi usyndy. «Eresekter men balalarǵa arnalǵan dramatýrgııalyq shyǵarmalardy laıyqty jáne ashyq baıqaý nátıjesinde ózderińiz irikteısiz. Bul – meniń ıdeıam. Eger meniń osy usynysymdy qoldasańyzdar 2020 jyldan bastap úzdik shyǵarmalardy sahnalaýǵa qarjy bóletin bolamyz»- dedi B. Saǵyntaev.
О́z kezeginde aqyn-jazýshylar atynan sóz alǵan Maral Ysqaqbaı, Dýlat Isabekov, Smaǵul Elýbaı, Qabdesh Jumadilov, Esenǵalı Raýshanov, Muhtar Shahanov, Ahmetjan Ashırı, Temirhan Medetbek, Lıýbov Shashkova, Kádirbek Segizbaev, Iran-Ǵaıyp Orazbaev, Rafael Nızbekov syndy qalamgerler ádebıettiń aınalasyndaǵy mańyzdy máselelerdi qaýzap, usynys tilekterin bildirdi. Ákim nazaryna qaladaǵy Ahmet Baıtursynuly atyndaǵy mýzeıdiń búgingi múshkil hali, aıtyla-aıtyla jaýyr bolǵan qalamaqy máselesi, shyǵarmashylyq Odaqtardaǵy jastardyń áleýmettik jaǵdaıyn retteý sekildi usynystar baıandaldy. Memleket basshysynyń tikeleı qoldaýymen keń kólemde atalyp ótiletin hakim Abaıdyń 175 jyldyǵynyń bıik deńgeıde ótýine zor kóńil bólinetinin alǵa tartty.
Basqosýdy qorytyndylaǵan Qazaqstan Jazýshylar Odaǵynyń Basqarma Tóraǵasy Ulyqbek Esdáýlet eldegi mádenı-rýhanı jaǵdaılardy ilgeriletýge úles qosyp, ıgi isterge bastamashy bolýdan qalamgerler qaýymy da qalys qalmaıtynyn jetkizdi.
ALMATY