Premer-Mınıstri Asqar Mamınniń tóraǵalyǵymen ótken Úkimet otyrysynda áleýmettik mańyzdy taýarlarǵa baǵalardyń turaqtylyǵyn qamtamasyz etý máseleleri qaraldy. Bul týraly primeminister.kz habarlady.
Saýda jáne ıntegrasııa mınıstri B. Sultanov, QR ulttyq ekonomıka mınıstri R. Dálenov, QR aýyl sharýashylyǵy mınıstri S. Omarov azyq-túlik taýarlarynyń qazirgi baǵalary, turaqtandyrý qorlarynyń qyzmeti jáne baǵalardyń ósýine jol bermeý boıynsha qabyldanyp jatqan sharalar týraly baıandady. Soltústik Qazaqstan oblysynyń ákimi Q. Aqsaqalov, Jambyl oblysynyń ákimi A. Myrzahmetov óńirlerdegi jumystar týraly baıandady.
Áleýmettik mańyzy bar azyq-túlik taýarlarynyń baǵalaryn turaqtandyrý jáne ustap turý, olardyń ósý sebepterin birtindep joıý maqsatynda osy jyldyń 16 tamyzynda kúshine engen sharalar kesheni ázirlendi. Olardyń ishinde — otandyq taýar óndirýshilerdiń taýarlardy barlyq saýda nysandaryna ornalastyra alý múmkindigi, áleýmettik mańyzy bar azyq-túlik taýarlaryna saýda ústemesin 15%-dan aspaıtyn mólsherde bekitý jáne jetkizýshilerden syıaqy alýǵa tyıym salý, 4 negizgi taýarlyq pozısııaǵa (pııaz, kartop, sábiz, qyryqqabat) baǵanyń maýsymdyq ósýine jol bermeý. Sonymen qatar, óńirler kóterme-taratý saýda ortalyqtarynyń, saýda obektileriniń qurylysyn jáne naryqtardy jańǵyrtýdy qamtamasyz etedi.
QR Premer-Mınıstri Asqar Mamın Memleket basshysy Qasym-Jomart Toqaevtyń jaqynda Aqordada ótken keńeste áleýmettik mańyzy bar azyq-túlik taýarlaryna baǵany ustap turý máselesiniń mańyzdylyǵyn atap ótkenin aıtty.
«Ákimder baǵa ósimine jol bermeý máselesin erekshe baqylaýda ustaýy qajet jáne kún saıyn monıtorıng júrgizip, jedel sharalardy qabyldaýy tıis», — dedi Asqar Mamın. Ákimdikterge áleýmettik mańyzy bar azyq-túlik taýarlaryna baǵany turaqtandyrý tetikterin iske asyrýdyń úlgilik óńirlik erejelerin bekitý jumystaryn jedeldetý jáne turaqtandyrý qorlarynda ónimderdi satyp alýǵa aldyn ala kirisý tapsyryldy. Satyp alýlar ıntervensııalaryn júzege asyrý úshin ÁKK shottary men depozıtterinde 3,7 mlrd teńge bar.
Turaqtandyrý qorlary jumysynyń tıimdiligin odan ári arttyrý maqsatynda, QR Premer-Mınıstri atap ótkendeı, turaqtandyrý qorlarynyń qyzmetine tekserý júrgizý, olardyń jumysyn qaıta qurý jáne taýarlyq ıntervensııalar úshin satyp alýdy jedel júrgizý qajet. Sondaı-aq, asa áleýmettik mańyzy bar 10 ónimdi shyǵarý baǵdarlamasyn ázirleý tapsyryldy. Bul baǵany ustap turýdyń mańyzdy faktory bolady.
Mınıstrler kabınetiniń basshysy QR Saýda jáne ıntegrasııa mınıstrligine qysqa merzim ishinde biryńǵaı onlaın platformanyń ázirlenýin qamtamasyz etýdi tapsyrdy. Atalǵan júıeniń kómegimen azamattar áleýmettik mańyzy bar azyq-túlik taýarlarynyń baǵalaryn óńirler men naqty dúkender turǵysynan onlaın rejıminde qadaǵalap, sonymen qatar baǵa monıtorıngine tikeleı qatysa alady.