Qorǵas shekaralyq baqylaý otrıadynyń «Halyqaralyq shekara boıy yntymaqtastyǵy ortalyǵy» bólimshesiniń shekara narıady Ortalyq aýmaǵyna 13 dana buǵy múıizderiniń kesindilerin alyp kirmek bolǵan 50 jastaǵy qazaqstandyqty ustady. Tárkilengen taýar aktimen «Altynkól» keden beketiniń qyzmetkerlerine tapsyryldy. Bul týraly UQK ShQ baspasóz qyzmeti habarlady.
Qordaı shekara otrıadyna qarasty «Qarasý» zastavasynyń aýmaǵynda shekara narıady ótken túnde ózderinen 150 metrdeı qashyqtyqta beıtanys eki adamnyń jasyrynyp, shekaranyń arǵy jaǵyn barlaı qarap turǵanyn baıqap qalǵan. Lezde zastavaǵa habar berilip, jeke quram kóterilip, qarýlandyryldy. Beıtanys adamdar baıqalǵan jerge shuǵyl túrde kelip jetken dabyl toby 39 jastaǵy áıel men 19 jastaǵy boıjetkendi (ekeýi de Qyrǵyz Respýblıkasynyń azamattary) ustady. Tekserý jumystary júrgizilip jatyr.
Esirtkiniń salmaǵy 20 kg emes, 45 kg eken. Keshe keshkilik QR UQK Shekara qyzmetiniń Ońtústik óńirlik basqarmasyna qarasty «Qordaı-avto» tekserip-ótkizý bólimshesinde kórshiles elden Qazaqstanǵa qaraı Toyota Land Cruiser Prado avtokóligimen iri kólemde «gashısh» esirtkisin alyp kirmek bolǵan 56 jastaǵy qazaqstandyqtyń ustalǵandyǵy týraly habarlaǵan bolatynbyz. Sál asyǵystyq tanytqanymyzǵa keshirim ótinemiz, biz habarlamany jibergennen soń belgili bolǵandaı, kólikten tabylǵan esirtki zatynyń jalpy salmaǵy 45 kg-ǵa jýyq eken. Ustalǵan azamat aıǵaq zatymen quqyq qorǵaý organdaryna tapsyryldy.
Merke tekserip-ótkizý pýnkitiniń «Aısha bıbi» bólimshesinde shekarashylar Qyrǵyz Respýblıkasynan elimizge qaraı «Daf» júk kóligimen kele jatqan 1967 jylǵy reseılikti ustady. Bul azamatty ustaýǵa sebep bolǵan – avtokólik tirkemesindegi qaptar, dálirek aıtqanda qaptardyń ishindegi uzyn sany 1000-ǵa jýyq qoldan jasalynǵan pyshaqtar. Ustalǵan azamat júgimen Jambyl aýdandyq polısııa bólimine tapsyryldy.