Qazaqstan astanasy sheteldik jýrnalıster úshin uıymdastyrylǵan arnaıy «mádenı» baspasóz týrynyń sońǵy núktesi boldy. Is-shara barysynda olar Almaty, Shymkent qalalary jáne Almaty men Túrkistan oblystaryn aralap qaıtty. Bul týraly Syrtqy ister mınıstrliginiń baspasóz qyzmeti habarlady.
Bir aptaǵa sozylǵan baspasóz týrynyń basty maqsaty – álemdik qaýymdastyqqa «Jahandyq álemdegi zamanaýı qazaqstandyq mádenıet» jobasy aıasynda elimizdiń baı mádenıeti men tarıhyn tanystyrý. Saparǵa Aýstrııa, Germanııa, Italııa, Koreıa, Qytaı, Shvesııa, Shveısarııa, Fransııa, Japonııa jáne t.b. elderden «Le Figaro», «Die Presse», «Global Times», «Korean Broadcasting System», «Specchio Economico» jáne basqa basylymdardyń 15 tilshi qatysty.
Syrtqy ister mınıstrligi óńirlik ákimdikterdiń qoldaýymen uıymdastyrǵan baspasóz týrynyń barysynda sheteldik BAQ ókilderi Qazaqstannyń zamanaýı mádenıetimen, ónerimen, tarıhymen jáne kórnekti jerlermen tanysty.
«Ońtústik astanada» sheteldik jýrnalıster birqatar mádenı jáne tarıhı mekemelerge, sonyń ishinde Á.Qasteev atyndaǵy óner murajaıyna, «Qazaq Oner» qolónershiler ortalyǵyna baryp, Qazaqstannyń kórkem mádenıetimen, dástúrli qazaq mýzykalyq aspaptarymen jáne dástúrli mýzykalyq baǵyttarymen tanysty. О́ner ortalyǵynda kelýshilerge qolónershiler óziniń shaǵyn «sheberlik sabaǵyn» ótkizdi.
Kóktóbede serýendeýden, Medeý muz aıdyny men Shymbulaq taý-shańǵy kýrortynan jáne úlken Almaty kóline saıahattan umytylmas áser alǵan jýrnalıster bolashaqta Almatyǵa dostarymen jáne otbasylarymen oralýǵa ýáde berdi. Sharyn shatqalyna jasalǵan kelesi kúngi saıahat ta áserli boldy.
Shymkentte jáne Túrkistan oblysynda jergilikti ákimdikterdiń qoldaýymen qonaqtar ejelgi Otyrar qalasyna, Arystanbab pen Qoja Ahmet Iаssaýı kesenelerine, sondaı-aq oblystyń basqa týrıstik oryndaryna bardy.
Nur-Sultan qalasynda jýrnalıster Mádenıet jáne sport mınıstri Aqtota Raımqulova, Qazaqstan Respýblıkasy Parlamenti Májilisiniń Halyqaralyq ister, qorǵanys jáne qaýipsizdik komıtetiniń tóraǵasy Muhtar Erman jáne Májilistiń ózge de birqatar depýtattarymen kezdesýler Qazaqstandaǵy mádenı murany saqtaý, damytýǵa, sondaı-aq týrızmdi jáne shet elderde tarıhı jáne muraǵat derekterin zertteý úshin halyqaralyq qatynastardy nyǵaıtýǵa baǵyttalǵan memlekettik saıasat týraly molyraq maǵlumat alýǵa múmkindik berdi.
Elordada jýrnalıster «EKSPO-2017» qazaqstandyq pavılony men Ulttyq murajaıda bolyp, «Astana Opera» teatrynda ótetin Qaraǵandy akademııalyq mýzykalyq komedııa teatrynyń «Alqyzyl jelkender» mýzykalyq qoıylymyn tamashalady.
Jýrnalısterdiń basym bóligi sapardyń arqasynda tereń tarıhy men baı mádenıeti, qonaqjaı halqy, taza kósheleri men zamanaýı ınfraqurylymy bar jas memleketpen tanysqanyn atap ótti. «Bul elde talǵampaz týrıstke de tabylatyn qyzyqtar bar» degen qonaqtar Qazaqstanǵa kelip, eldi jańa jaǵynan taný kerek degen pikirge biraýyzdan kelisti.