Kereký óńirinde ÚEU – bıznes – memleket seriktestigine arnalǵan «ASAR» III respýblıkalyq forýmy ótti. Jıynǵa oblys ákimi Bolat Baqaýov, Aqparat jáne qoǵamdyq damý vıse-mınıstri Danııar Esın, «Atameken» UKP basqarma tóraǵasynyń orynbasary Oljas Ordabaev, «Ekologııalyq uıymdar qaýymdastyǵy» basqarmasynyń tóraıymy Aıgúl Soloveva qatysty.
«Qazaqstan azamattyq alıansy» birlestiginiń prezıdenti Asylbek Qojahmetov byltyr ashylǵan oblystyq «Azamattyq alıans» úıiniń qoǵam úshin mańyzdy ekenin atap ótti. Onda óńirdegi 12 qoǵamdyq uıymnyń keńseleri men zaly, kovorkıng ortalyǵy ornalasqan. Meıirimdiler klýby, oblystyq «Jasyl el» jastar shtaby, Geografııa úıi, óńirlik «Jartylaı qyzyl aı» fılıaly, «Úmit úzbeý» jáne basqa da belgili uıymdar jumys isteıdi. Osy jerde kezdesýler men trenıngter ótedi. Oblysta barlyǵy 700-den asa ÚEU tirkelgen. «Bıznestiń keıbir salasyn yntalandyrý úshin áleýmettik-kásipkerlik korporasııany qosý qajet. Onyń áleýmettik mańyzy bolýy tıis. Baqylaý keńesine kásibı biliktiligi bar azamattyq sektor men «Samuryq-Qazyna», «Báıterek» jáne «QazAgro» holdıngi ókilderin qosqan durys bolar edi», deıdi A.Qojahmetov.
Forýmǵa qatysýshylar ınnovasııalyq jobalarymen tanystyrdy. Máselen, Oral qalasynan kelgen «Arba» qoǵamdyq birlestiginiń tóraıymy Gúlmıra Batpaqulova «Ǵıbadat» jáne «Báıterek» birlestikteri týraly áńgimeledi. Bul uıymdar jarymjan balalardyń ómir súrý sapasyn jaqsartýǵa arnalǵan kýrstar men qımyl-qozǵalysy az balalardyń artyq salmaq qosyp almaýy úshin durys tamaqtaný maqsatynda as mázirin qurýǵa kómektesedi.
«Elimizde qyrkúıek aıynda «Otbasylyq áleýmettik karta» iske qosylady, – deıdi sarapshy Lázzat Nurqatova. – Elbasy partııalyq forýmda ár otbasyna deıin jetý týraly aıtty. Bizdiń qaýymdastyq sarapshylary karta ındıkatorlaryn ázirlep, ár otbasy úshin shuǵyl, qanaǵattanarlyq, krızıstik, ortasha jáne jaqsy anyqtamalaryn beredi». Onyń aıtýynsha, bir rettik qaıyrymdylyq sharasy otbasyn qıyn jaǵdaıdan shyǵarmaıdy. Sondyqtan bul iske azamattyq sektor men bıznes-qoǵamdastyq ta qatysýy kerek.
Al «Parýs» demalys aımaǵynyń dırektory Qaırat Sultanov óz kásibin qalaı qurǵanyn aıtyp berdi. «Aqmola oblysynyń Zerendi aýdanynda 20 jyl turyp qalǵan pıonerlik lagerdi satyp aldyq. Demalys aımaǵynda jylyna 10 myń adam demalady. Demalys ornyn jylytý úshin kómir jaqtyq. Ekologııalyq tıimdiligi úshin gaz tarttyryp, qazandyqtar da ornattyq. Zań júzinde aýmaqta gaz tartýǵa, elektr jelisin tartýǵa, qurylys salýǵa tyıym salynady. Sońynda kún panelderin ornattyq, degen ol gaz tartý, jyly sý, energııa boıynsha jobalardy júzege asyrý týraly usynysyn bildirdi. Kásipkerdiń aıtýynsha «Jasyl» energııaǵa da ınvestsýbsıdııa bólinýi kerek. Sonymen qatar Qyzylorda qalasynan Maıa Narımova basqaratyn «Jomart» qoǵamdyq birlestigi, ECO–ASAR baǵytynda baıanaýyldyq Batyrbek Arqarbaıuly óz jobalaryn usyndy. AQSh-tyń USAID Halyqaralyq damý agenttiginiń Nur-Sultan qalasyndaǵy keńsesiniń jetekshisi Raıan Ýeddl bıznes seriktesterine turaqty túrde kómektesý qajettigin, bul úshin «Azamattyq alıanspen» ortaq múddede jumys isteýi tıistigin jetkizdi. Al S.Toraıǵyrov atyndaǵy ýnıversıtettiń Áleýmettik máseleler boıynsha departamenti basshysynyń mindetin atqarýshy Darhan Qarjaýbaı bul forýmnyń stýdentterge de paıdaly bolǵanyn atap ótti.
PAVLODAR