Sıngapýrlyq KinderWorld International Group Ltd kompanııasy Shymkentte bilim metropolısinen turatyn halyqaralyq bilim berý klasterin salýǵa nıet bildirdi. Atalǵan ortalyqta halyqaralyq mektep, kolledj jáne balabaqsha bolady dep josparlanýda. Osyǵan oraı Shymkent qalasynyń ákimi Erlan Aıtahanov sıngapýrlyq kompanııa tóraǵasy Rıkı Tenmen kezdesti. Taraptar bilim ortalyǵynyń bolashaq áleýetin talqylap, usynystaryn ortaǵa saldy.
Aıta ketý kerek, KinderWorld International Group Ltd kompanııasynyń bilim berý klasteri Aýstralııa, Vetnam jáne Malaızııada balalarǵa sapaly bilim berýmen aınalysyp keledi. Endi sıngapýrlyqtar Qazaqstan naryǵyna kirip, elimizde óz ortalyqtaryn salmaqshy.
E.Aıtahanov respýblıkalyq mańyzy bar qala mártebesin jýyrda alǵan Shymkent úshin jańa oqý oryndary asa mańyzdy ekenin aıtyp, qalanyń damýyna zor úles qosatynyna senim bildirdi. Jańa jobanyń quny shamamen 23-25 mln AQSh dollaryn quraıdy. Ony súıemeldeýmen «Kazakh invest» AQ aınalyspaq. Ortalyqtan ashylatyn balabaqsha 6 aıdan 6 jasqa deıingi 600 balaǵa laıyqtalǵan. Onda jabyq oıyn alańy men basseın bolady. Baqshada balalardy shet tilderine, oqý men sanaýǵa, qoǵamtaný, mýzyka, bı men beıneleý ónerine úıretedi. Munan bólek, 3-ten 12 jasqa deıingi balalarǵa arnalǵan baıytý ortalyǵyn ashý josparlanýda, onda balalar ǵylymmen, tehnologııalarmen, ınjenerııamen, matematıkamen, robototehnıkamen jáne AR/VR júıesimen tanysady.
Al halyqaralyq mektepte dástúrli pánderden basqa baǵdarlamalaýǵa, robototehnıkaǵa jáne 3D baspaǵa arnalǵan fakýltatıvtik sabaqtar ótedi. Sondaı-aq AQSh-ta jáne basqa da elderde oqytatyn stýdentterdiń jazǵy almasý baǵdarlamalary jumys isteıtin bolady.
Bilim berý metropolısi – bul balalar, jastar jáne qoǵam úshin túrli bilim berý is-sharalaryn ótkizý josparlanyp otyrǵan oqý keńistigi. Metropolıstiń dızaıny men tujyrymdamasy Sıngapýrdyń ulttyq ýnıversıtetiniń qalashyǵyna uqsas bolmaq. Bolashaqta zamanaýı metropolıs ýnıversıtet, jataqhana, ǵylymı ortalyq, medısınalyq ortalyq, eksperımenttik oqý-oıyn ortalyǵy jáne basqa da qajetti ınfraqurylymdardy qamtyǵan iri keshenge aınalmaq.
ShYMKENT