Búgin Almaty qalasynda Qyrǵyz memleketindegi Jeńis shyńynda joǵalǵan qazaqstandyq alpınısterdi izdeý operasııasynyń qorytyndysy boıynsha Qorǵanys mınıstriniń baspasóz-konferensııasy ótti. Sharaǵa izdeý-qutqarý operasııasynyń músheleri Qorǵanys mınıstrliginiń áskerı alpenısteri kapıtan Maqsut Jumaev, aǵa leıtenant Vasılıı Pıvsov, sondaı-aq Alpenızm jáne sporttyq quzǵa shyǵý federasııasynyń bas hatshysy Qazbek Valıev qatysty. Bul týraly mınıstrliktiń baspasóz qyzmeti habarlady.
Áskerıler Jeńis shyńyn 14 ret aınalyp ushyp ótti. 22 tamyz kúni izdeý-qutqarý operasııasynyń jetekshisi Vasılıı Pıvsovtyń aıtýy boıynsha áýeden sholý men arnaıy qurylǵydan baqylaý esh nátıje bermegen. Tiri adamdardyń eshqandaı belgisi men denesi tabylmaǵan.
Joǵalǵan qazaqstandyq alpınıstiń jubaıy Shaharızada Shahbýtova qutqarýshylarǵa alǵys aıtty.
«Qatal aýa-raıyna qaramastan qutqarýshylar qoldarynan kelgenin aıamady. Kómekteri úshin alǵys aıtamyn. Qyrǵyz memleketindegi Qazaqstan elshiligine, Qorǵanys mınıstriniń baspasóz hatshysyna, alpınısterge rahmet. Olar óz isiniń sheberleri. Shyndyǵynda izdeýge uzaq ýaqytty arnap, habarlasyp otyrdy. Áli de jigitterdiń qaıtyp keletinine úmitimizdi úzbeı, tek jaqsylyqqa ǵana senemiz. Taǵy da barlyǵy úshin rahmet! Olar elimizdiń laıyqty azamattary, jaqyn dostary, naǵyz jigitter» - dedi óz sózinde Qyrǵyz memleketindegi Jeńis shyńynda joǵalǵan qazaqstandyq alpenıstiń jubaıy.