Qazaqstannyń Tuńǵysh Prezıdenti – Elbasy Nursultan Nazarbaev elimizdiń shahterlaryn kásibı merekelerimen quttyqtady dep habarlaıdy elbasy.kz.
«Qurmetti kómir óndirý salasynyń eńbekkerleri men ardagerleri! Sizderdi Shahter kúnimen quttyqtaımyn!
Men kenshilerge árdaıym zor qurmetpen qaraımyn, óıtkeni shahter eńbeginiń beıneti maǵan jaqsy tanys.
Bul mamandyq qashanda temirdeı tózim men jaýapkershilikti, janqııarlyq pen qaısarlyqty talap etedi. Sondyqtan da sizder qajyrly eńbekterińiz arqyly qoǵamda shynaıy qurmetke bólenip kelesizder.
Kómir óndirisi bizdiń ındýstrııamyzdyń berik negizi ekenin nyq senimmen aıtýǵa bolady. Bul salanyń eńbekkerleri ony damytýǵa qosqan qomaqty úlesterin, óz jumystarynyń nátıjesin oryndy maqtanysh ete alady.
Aldaǵy ýaqytta da otandyq ekonomıkanyń tıimdi órkendeýine jáne eldiń energetıkalyq áleýetiniń nyǵaıýyna atsalysa beresizder dep kámil senemin.
Sizderge myqty densaýlyq, tabys pen ıgilik, otbasylaryńyzǵa baq-bereke tileımin!» - delingen Elbasynyń quttyqtaýynda.