Búginde oblystaǵy aýyl sharýashylyq maqsatyndaǵy jerlerdiń kólemi 7 mıllıon gektar bolsa, 4,9 mıllıon gektaryn egistik alqaptar, 1,9 mıllıon gektaryn jaıylymdyq jerlerdi quraıdy.
Sońǵy bes jyldyń ishinde jalpy aýmaǵy 2,9 mln. gektarǵa 1887 tekserý júrgizilip, jer zańnamasyn buzýdyń 985 deregi tirkelgen. Tekserý nátıjeleri boıynsha jaldaý sharttary buzylyp, 658,3 myń gektar jer memleket menshigine qaıtarylǵan.
Qaraýsyz qaldyrý saldarynan durys ıgerilmeı otyrǵan alqaptar áli de jeterlik. Bıyl 316 tekserý júrgizilip, jartysyna jýyǵynda zańdy belden basý áshkerelengen. 5392 gektar aýyl sharýashylyq jeri boıynsha kelisim- sharttar kúshin joıyp, 10,6 myń gektary memleket menshigine ótken. Qazirgi ýaqytta 3 sharýashylyqtyń 20 myń gektardan astam ıgerilmegen alqaptaryn qaıtarý sotta qaralýda.
Jer ınspeksııasy basqarmasynyń basshysy Beıbitbek Jaılybaevtyń aıtýynsha, aýdandarda 107 tekserý júrgizilip, 5 mıllıon teńge aıyppul salynǵan.
«Igerilmeı bos jatqan jerlerdi memlekettik qorǵa qaıtarý jumystary oblys ortalyǵynda da óz sheshimin taýyp keledi. Jalpy aýmaǵy 2,5 gektar 10 ýchaske alyndy. Taǵy 20 jer telimin paıdalanýshy óz erkimen qaıtardy. «Shyǵys Elıon» JShS jer ýchaskesin 20 jyldan artyq ıgermegen. Bul orynǵa endi kópbeıindi 500 oryndy aýrýhana salynady. Oblys ortalyǵynda kóptegen jerler bos. Kásipkerler ol ýchaskelerdi bir-birine satyp kelgen. Maqsatty paıdalanylmaǵandyqtan bul jerler qaıtarylady, ol aımaqtarǵa sáýletti ǵımarattar turǵyzyzylyp, jumys oryndaryn ashatyn kásipkerlerge beriledi», deıdi ol.
Basqarmanyń málimetinshe, sońǵy 5 jyldyń ishinde jer zańnamasy normasyn buzýshylarǵa 1024 nusqama berilip, jalpy somasy 64 mln. teńgege 621 ákimshilik jaza qoldanylǵan. Jerdi ıgermegenderge salyq 10 ese ulǵaıtylady. Búgingi kúnge deıin 442,1 mln. teńge mólsherinde salyq salynsa, onyń 38,5 mıllıondaıy bıylǵy jylǵa tıesili.
Soltústik Qazaqstan oblysy