Jyl aıaǵyna deıin 4 mıllıard teńgege zamanaýı tehnologııalarǵa negizdelgen medısınalyq qondyrǵylar satyp alý josparlansa, solardyń birqatary jetkizildi.
Bul qarajat byltyrǵydan úsh ese kóp. Resmı málimetke súıensek, 9000 soltústikqazaqstandyqtyń aǵzasynda qaterli isik bar. Naýqastar budan bylaı Fınlıandııadan jetkizilgen 140 mıllıon teńgelik sońǵy úlgidegi sıfrlyq mammograftyń kómegine súıene alady. Bul apparat arqyly sút beziniń qaterli isigin bastapqy kezeńde anyqtaı alady. Kesel erte tabylsa, emdeý de, saýyǵyp ketý de jeńil túspek. Burynǵy ýltradybystyq apparatpen sút beziniń jańadan paıda bolǵan isigin aıyrý qıyn-tuǵyn.
Onkologııalyq dıspanserdiń bas dárigeriniń orynbasary Oleg Dýdıaktyń aıtýynsha rak aýrýynyń taralýy jóninen oblys kórsetkishi joǵary. Onyń ishinde sút beziniń qaterli isigi keńinen taralǵan. Esepte ekimynan astam áıel esepke alynsa, 113-i bıyl anyqtalypty. Qondyrǵynyń kóp artyqshylyqtarynyń birine sút beziniń árbir mıllımetrin zertteıtin «gomosıntez» fýnksııasyn ataýǵa bolady.
Aımaq basshysy Qumar Aqsaqalov oblystyq eresekter aýrýhanasyna ornatylǵan zamanaýı kompıýterlik tomograftyń da jumysymen tanysty. Onyń quny 347 mıllıon teńgebolsa, 250 mıllıony jergilikti qazynadan bólingen. Adamnyń basyn, asqazanyn, býyndaryn, bir sózben aıtqanda, ishki qurylys keselderin óte dáldikpen birden anyqtap beredi. Jáne de bir ǵajaby, AQSh-tan ákelingen qurylǵynyń dıagnostıkalyq qorytyndysyn álemniń kez kelgen jerine joldaýǵa bolady. Onnda ornalasqan serverlik nusqadaǵy stansa arqyly úsh maman bir mezgilde zert júrgize alady. Aýrýhana dárigeri Ivan Leıman magnıttik-rezonanstyq tomograftyń ábden eskirgenin, jıi syna beretinin aıtyp edi, Qumar Irgebaıuly jyl aıaǵyna deıin jańasyn satyp alyp berýge ýáde etti. Buǵan qosa zamanýı angıograf ta alynady. Eski tomograf Taıynsha aýdandyq aýrýhanasyna jiberilip, Aıyrtaý, Aqjar, Ýálıhanov aýdandarynyń turǵyndaryna qyzmet kórsetedi.
«Densaýlyq saqtaý salasynyń materıaldyq-tehnıkalyq bazasyn nyǵaıtý, kadrlar tapshylyǵyn joıý baǵytynda júıeli sharalar atqarylyp keledi. Bıyl emdeý mekemeleri 66 jedel járdem kóligimen , 80-ge jýyq qural-jabdyqpen tolyǵady. Kúzge taman 500 oryndy kópbeıindi aýrýhananyń qurylysy bastalady. Taıaý arada joǵary bilimdi 170 dıplomdy jas dáriger keledi, olardyń jartysyna jýyǵ aýyldyq jerlerge ornalasady. Eldi mekenge joldama alǵan mamandarǵa 1,5 mıllıon, qalalyqtar úshin 500 myń teńge kótermeaqy tólenedi. «Dıplommen–aýylǵa! baǵdarlamasy aıasynda jasalatyn jeńildikter az emes. Qazir 47 páter daıyn», dedi aımaq basshysy BAQ ókilderine bergen suhbatynda.
Soltústik Qazaqstan oblysy