Almatyda Ortalyq saıabaqta egizder sherýi ótti. Júz elýden astam egizder jınalǵan mereke balalar ǵana emes, egizder tárbıelep otyrǵan otbasylar úshin erekshe kúnge aınaldy.
Egiz qozydaı ósip kele jatqan balalardyń tárbıesinde ata-anasy ǵana emes, ata-ájeleri men kómekshileriniń ornyn erekshe atap ketken jón. Merekelik sharada balalar ǵana emes, ata-analary, ata-ájeleri de pikirlesip, tárbıe barysyndaǵy tájirıbelerimen bólisti. Tipten, bolashaq sábıleriniń egiz bolyp týylatyndyǵynan habardar bolǵan er adamdardyń birqatary qobaljý sátterin basynan ótkergendigin estiginde egiz bala tárbıesiniń ońaı bolmaıtyndyǵyna kóz jetkize túskendeı boldyq.
Dárigerdiń árbir tekserýine kelgen saıyn qolbaljýly kúı keshken ákeler keıinnen sábıleri ómirge kelgende erekshe qýanǵandaryn da jasyrmady. Al myna bir otbasynyń tarıhy múlde ózgesheligimen qyzyqtyrdy. Almas pen Nazıranyń otbasynda ómirge kelgen egiz uldyń esimderin qoıýdyń ózi úlken jaýapkershilik júktepti. Mamyr aıynyń 9-y kúni dúnıe esigin ashqan qos sábıdiń esimin ata-ájesi men ata-anasy kóp oılanbastan, qazaqtyń taý tulǵaly batyrlary Baýyrjan men Raqymjan atalaryndaı bolsyn dep yrymdap qoıǵan eken. Bul kúnderi tórt jasqa kelgen egizder ata-ájesiniń kóz qýanyshy. Batyr atalaryndaı eline qyzmet etetin azamattar bolyp ósýi úshin otbasy músheleri Baýyrjan men Raqymjanǵa sapaly bilim men sanaly tárbıe berýdi maqsat etedi.
ALMATY