25 tamyz kúni el astanasyndaǵy Arbatta oqyrman men avtorlardyń, baspagerlerdiń basyn qosqan «KITAP FEST 2019» kitap festıvali ótti.
Kitap jármeńkesine 20 dúken, baspa jáne ınternet-dúkender qatysyp, kitapsúıer qaýymǵa festıval aıasynda arnaıy jeńildikter usyndy. Sondaı-aq, shara barysynda «I BOOK YOU» kitap almasý jobasy júzege asyrylyp, qonaqtar ózderiniń oqyǵan kitaptaryn oqymaǵan kitaptarǵa aýystyryp alyp jatty.
«Ortalyqtandyrylǵan kitaphana júıesinen tegin kitaptar usynylady. Olardyń sany shekteýli bolǵandyqtan, alyp úlgerý kerek. О́z kitaptaryńyzdy ákelip, oqymaǵan kitaptarǵa almastyrýǵa bolady», dedi «KITAP FEST 2019» jobasynyń bas úılestirýshisi Maıra Áljanova.
Esil jaǵalaýyndaǵy jas jetkinshekterge kórsetilgen oıyn-saýyq baǵdarlamalary men sheberlik synyptar bala-oqyrmandardyń kóńil aýlap, erekshe atmosfera syılady.
Oqyrmandar «Jazýshylar shatyrynda» qazirgi avtorlarmen tanysyp, jańa kitaptardyń tusaýkeserine qatysty. Onda pıanınoshy, Qazaqstannyń halyq ártisi Jánııa Áýbákirova «Varıasıı na temy» kitaby týraly aıtsa, fılosofııa ǵylymdarynyń kandıdaty Zıra Naýryzbaeva «Tórt bult» atty eńbegin tanystyrdy. «100 jańa esim» jobasynyń laýreaty Aıdıe Aıdarbekova «Meniń teńizim – seniń aspanyń» atty óleńder jınaǵynyń tusaýyn kesip, aqyn Aıjan Tábárákqyzy «Sen jylamashy» kitaby haqynda kórermenmen oı bólisti. Ssenarıst Záýre Tórehanova «Amına Turan nomadtar elinde» romanyn usynyp, saıahatshy Tınkaı Kretova kópshilikke «Qazaqstandyq» atty jańa kitabyn baıandady.
«Jazýshylar shatyrynyń» arnaıy qonaǵy – Aqan Sataevtyń «Tomırıs» fılminde oınaǵan aktrısa Almıra Tursyn jazýshy Bolat Jandarbekovtiń «Tomırıs» shyǵarmasynan úzindi oqydy.
«Offline kitaptar týraly» atty shatyrda qoǵam qaıratkerleri, jýrnalıster, kásipkerler, atap aıtsaq, blogerler О́rken Kenjebek, Aına Dosmuhambetqyzy, Dınara Bolat, polıtolog, Ortalyq kommýnıkasııalar qyzmetiniń basshysy Talǵat Qalıev túrli ózekti taqyrypta sóz qozǵady.
Bıyl elorda halqyna alǵash ret usynylǵan «KITAP FEST» jobasy buǵan deıin Almatyda bes jyl qatarynan ótkizilgen bolatyn. Uıymdastyrýshylardyń sózinshe, osy ýaqyt aralyǵynda atalǵan shara qarapaıym kitap almasý aksııasynan jurtshylyqtyń súıispenshiligine bólengen mádenı-tanymdyq sharaǵa aınalǵan. Bes jyldyń ishinde osy alańda avtorlar men baspalardyń qatysýymen 130 kitaptyń tusaýy kesilip, 20 myń kitap qonaqtarǵa syılanǵan. 70 kitap dúkeni jármeńkege qatysyp, 45 bloger súıikti kitaptarymen bólisken.
«Sharanyń maqsaty – jurtshylyqty kitap oqýǵa shaqyryp, qazaqstandyq avtorlar men baspalarǵa qoldaý kórsetý. Bul jas jáne aǵa býyn avtorlarlardyń óz kitaptaryn usynatyn jalǵyz alań deýge bolady. Munda olar kitaptary týraly aıtyp, qyzyǵýshylyq tanytqan baspalar men kitap dúkenderin taba alady», dep atap ótti Maıra Áljanova.
Jastar jyly aıasynda ótip jatqan atalmysh kitap jármeńkesin qalalyq ákimdiktiń qoldaýymen «Astana jastary» memlekettik mekemesi, «BAURZHAN» jeke qory, «ABAYbooks» baspa úıi uıymdastyryp otyr.