Sanaýly kún buryn qazaqstandyq belgili trıatlonshy Ánel Sytdyqova La-Mansh buǵazyn baǵyndyryp, táýelsiz memleketimizdiń kók baıraǵyn jelbiretti. Batyr qyzdyń Fransııanyń soltústigi men Brıtanııa araldarynyń ońtústik-shyǵysyn jalǵap jatqan La-Mansh buǵazynyń 38 shaqyrymdyq aralyǵyn 15 saǵat 15 mınýt ýaqyt ishinde gıdrokostıým kımeı júzip ótýi – álemdik deńgeıdegi sensasııa.
Buǵaz sýynyń salqyndyǵy 15-16 gradýs qana, al osyndaı sýǵa túsip qana qoımaı ony júzip ótý erlikke – para-par áreket ekeni sózsiz. Osy jetistikke oraı Mádenıet jáne sport mınıstri Aqtoty Raıymqulova óziniń júrekjardy lebizin bildirip, alǵys hat joldady.
«Siz erekshe daryndylyǵyńyz ben eńbekqorlyǵyńyzdyń, qaısar, órshil minezińiz ben jeńiske degen qulshynysyńyzdyń arqasynda Ulybrıtanııa men Fransııanyń jaǵalaýlaryn jalǵap jatqan áıgili La-Mansh buǵazyn júzip ótip, álemge halqymyzdyń órshil rýhyn kórsete bildińiz. Bul – naǵyz qaısar qazaq qyzynyń bıik belesi. Alǵa qoıǵan maqsattaryńyzǵa qol jetkizip, jańa asýlardy baǵyndyra berińiz!» delingen alǵys hatta.
Memleketimizdiń mártebesin bıiktetken Á.Sytdyqovany Almaty halyqaralyq áýejaıynda T.Júrgenov atyndaǵy Qazaq ulttyq óner akademııasynyń ujymy qoshemetpen qarsy aldy. Týǵan jerge úlken jeńispen oralǵan Ánel Álibekqyzyna halqymyzdyń ystyq yqylasy men aq nıetin jetkizdi.
«Jaraısyń, Ánel!» deımiz biz de.
Almaty