Qasıetti Qarqaraly topyraǵyna Alashtyń ardaqtylary Ahmet Baıtursynulynyń, Álıhan Bókeıhannyń jáne Álimhan Ermekovtiń tulǵalary qoladan quıylǵan eskertkish bolyp ornyqty.
«Rýhanı jańǵyrý» baǵdarlamasy aıasynda dúnıege kelgen bul eskertkishtiń avtorlary – jergilikti sýretshi Sáken Dáýletbaev, músinshiler Talǵat Baıorazov pen Kenjebek Qoshantaev. Kompozısııalyq músinniń bıiktigi 3,15 metrge teń bolsa, salmaǵy 2 tonna tartady.
Eskertkishtiń ashylý saltanatynda Qarqaraly aýdanynyń ákimi Halel Maqsutov quttyqtaý sóz sóılep, bul óner týyndysynyń «Rýhanı jańǵyrý» baǵdarlamasy aıasynda aýdanda júzege asyrylýy josparlanǵan 19 jobanyń biri ekendigin aıtty.
– Dóńgelek ústel basynda halqynyń jarqyn bolashaǵy týraly áńgime órbitip otyrǵan Álimhandy ustamdy da, sabyrly Álıhan jaǵyn taıanyp, únsiz oıǵa shomyp tyńdasa, al Ahań bolsa Álimhannyń kózinen ushqyndaǵan otty kórgendeı muqııat den qoıyp otyr, – dep eskertkish ıdeıasynyń syryn ashqan aýdan basshysy qaıratker tulǵalardyń bolmys-bitimin aıqyndap turǵan kompozısııanyń tarıhı jáne tárbıelik mán-mazmunynyń qundylyǵyna da basa nazar aýdardy. Ideıany iske asyryp, halyqtyń alǵysyna bólengen avtorlarǵa rızashylyq sezimin bildirdi.
Sondaı-aq, sátimen iske asqan sharýanyń qýanyshyna eńbek ardagerleri Amantaı Rahımov, Serik Jekeev, tarıh ǵylymdarynyń doktory, professor Sataı Syzdyqov, aıtysker aqyndar Qoılybaı Asanov pen Amanjol Áltaev, Aqtoǵaı aýdany ákiminiń orynbasary Abylaı Amanjolov jáne tarıhshy Qaırat Omarbekov kýá bolyp, jyly lebizderin bildirdi.
Eskertkishtiń ashylý saltanatynan keıin Alashtyń aıaýly uldarynyń rýhyna arnalyp as berildi.
Qaraǵandy oblysy