Parlament Senatynyń depýtaty Vladımır Volkov Almaty oblysy Qarasaı aýdanynda boldy. Turǵyndarmen júzdesý barysynda ónerkásipti, sportty damytýǵa, kommýnaldyq sala men turǵyn úı qurylysyna qatysty máseleler kóterildi. Senator Umtyl aýyldyq okrýginiń ákimimen, kommýnaldyq qyzmet basshylary jáne ókilderimen kezdesý ótkizip, eldi mekenderdi sýmen qamtamasyz etý, elektr qýatyn tolassyz berý, joldy jóndeý jáne jaryqtandyrý máselelerine baılanysty Kóldi aýyly turǵyndarynyń ujymdyq ótinishterin qarady.
Kezdesýde depýtat V.Volkov Qazaqstan Respýblıkasynyń Prezıdenti Q.Toqaev qoıǵan 10 basty mindetti iske asyrý boıynsha qabyldanyp jatqan sharalar týraly aıtyp, azamattardyń tabysyn arttyrý, turǵyn úı saıasaty jáne aımaqtardy keshendi damytýǵa qatysty máselelerge keńinen toqtaldy.
Senator Eltaı aýyldyq okrýgindegi Kókózek aýylynda 2006 jyly ashylǵan bylǵary shyǵaratyn «Almaty Tannery» JShS zaýytynda boldy. Kásiporyn iri qara maldan qýattylyǵy jylyna 2500 tonna shıkizat óndirip otyr. 2018 jyly ónerkásip ónimi 199,9 mln teńgeni qurap, 75 jumys orny ashyldy. Kezdesý barysynda sapaly shıkizattyń jetispeýi men otandyq bylǵary óndirýshilerdiń jaǵdaıy sóz boldy.
* * *
Al Parlament Májilisiniń depýtaty Nurlan Dýlatbekov Mańǵystaý ólkesine jumys saparymen keldi. Májilis depýtaty birqatar nysandy aralaýdy bastap ketti. Búgin halyq qalaýlysy «MAEK-Qazatomprom» JShS-da bolyp, ujymmen kezdesti. Aldymen mekemeniń murajaıyna bas suǵyp, kásiporynnyń tarıhymen tanysty. Odan ári JEO-1 jumysymen tanysty. Kásiporyn Aqtaý qalasy men jaqyn mańdaǵy aýyldardyń turǵyndaryn, sondaı-aq óńirdiń ónerkásiptik kásiporyndaryn aýyzsýmen jáne sharýashylyq sýmen, jylýmen jáne elektr energııasymen qamtamasyz etedi. Búginde mekemede tórt myńǵa jýyq maman jumys isteıdi. Qazirgi ýaqytta kombınat 600 Mvt-dan astam elektr qýatymen jumys isteý jáne táýligine 60 myń tekshe metrden astam dıstıllıat shyǵarý múmkindigi bar. Halyq qalaýlysy áleýmettik qamsyzdandyrý salasyna basa nazar aýdaryp, azamattardyń ál-aýqatyn jaqsartýǵa erekshe mán berilip kele jatqandyǵyn alǵa tartty. Birqatar ózekti áleýmettik máseleler kóterilip, aıtylǵan barlyq usynys-pikir Májilis depýtaty nazaryna alyndy. Odan ári Májilis depýtaty Sh. Esenov atyndaǵy ýnıversıtettiń ujymymen kezdesedi. Odan ári aýdandarǵa baryp, turǵyndardy jeke qabyldaý josparda bar.
* * *
Sondaı-aq Májilis depýtaty Nur Otan partııasy janyndaǵy Sybaılas jemqorlyqqa qarsy is-qımyl jónindegi qoǵamdyq keńes tóraǵasy Omarhan О́ksikbaev Almaty oblysynyń Eskeldi aýylynda azamattardy qabyldady.
Qabyldaýǵa kelgen azamattar depýtattan turǵyn úı qujattaryn retteý, turaqty jumyspen qamtý jáne basqa da ózderin tolǵandyrǵan kóptegen máseleni kóterdi.
– Partııalyqtar kez kelgen ýaqytta turǵyndardyń tilegine erekshe nazar aýdaryp, suraqtaryna jyldam jaýap berýge ázir bolýy tıis. Qazir biz sıfrly zamanda ómir súremiz. О́tinishter onlaın tirkeledi. Qoǵamdyq qabyldaý bólmeleriniń de jumysyn barynsha ońtaılandyryp, azamattardyń ótinishterin shuǵyl sheshýge kúsh salsaq, jumysymyz jemisti bolady. Aldyma kelgen azamattardyń ár suraǵyna den qoıyp, qolymda bar múmkindikti aıanbastan usyndym, – dedi Omarhan Nurtaıuly.
Jalpy, Eskeldi aýdandyq fılıalynyń qabyldaý bólmesine jyl basynan beri 177 ótinish kelip tússe, olardyń 60-y oń sheshimin tapqan. 4 myńnan astam partııa múshesi, 13 bastaýysh partııa uıymy bar. Partııalyq baqylaý qyzmeti men jemqorlyqqa qarsy is-qımyl jónindegi aýdandyq keńes jyl basynan onnan astam otyrys ótkizip, memlekettik mekemelerge 17 usynys bergen.