Qaraǵandyǵa jumys saparymen kelgen Densaýlyq saqtaý mınıstri Eljan Birtanov oblys ákimi Erlan Qoshanov jáne oblystyq densaýlyq saqtaý basqarmasynyń basshysy Erjan Nurlybaevpen birge óńirde mindetti medısınalyq saqtandyrý júıesin engizýge ázirlik barysyn talqylady.
Atalǵan júıe elimizdiń basqa óńirlerinde 2020 jyldyń basynan bastap iske qosylatyn bolsa, Qaraǵandy oblysy úshin osy jyldyń 1 qyrkúıeginen bastalady. Sondyqtan, bul aýqymdy sharýaǵa degen ázirlik barysy kún tártibinde ótkir turǵan máseleniń biri.
Jobany synamaly rejimde Qaraǵandy oblysynda engizý týraly sheshimniń ózindik sebepteri bar. Mysaly, mundaǵy medısınalyq mekemelerdiń túgelge derligi keshendi medısınalyq aqparattyq júıege kóshirilgen. Iаǵnı, bul emdelýshilerdiń dıagnozdary, taǵaıyndalǵan dári-dármekter men rásimder týraly barlyq derekter biryńǵaı derekqorda saqtalady degen sóz. Mine, osyndaı daıyn dúnıeniń arqasynda óńirde MÁMS júıesin engizý ońaıǵa túsetin túri bar.
Mınıstr Eljan Birtanov mindetti medısınalyq saqtandyrý júıesi týraly keńinen áńgimelep berdi.
– MÁMS degenimiz qorda jınaqtalǵan qarajattyń esebinen saqtandyrylǵan azamattarǵa ǵana kórsetiletin medısınalyq qyzmetterdiń qosymsha paketi. Bul toptamaǵa tomografııa, salalyq mamandardyń keń aýqymdy keńes berýi, tegin dári-dármek tizimin ulǵaıtý sııaqty qyzmetter kiredi. Búgingi tańda biz árbir úshinshi reseptýralyq dári-dármekti bıýdjetten tóleımiz. Birte-birte barlyq reseptýralyq dári-dármekter tegin nemese sýbsıdııalaýmen beriletin bolady, – dedi ol.
Jalpy, medısınalyq saqtandyrý júıesin testilik rejimde engizýge respýblıkalyq bıýdjetten 2,3 mlrd teńge bólingen. Júrgiziletin synaq júıedegi barlyq kemshilikterdi anyqtaýǵa jáne olardy 1 qańtarǵa deıin jedel túzeýge múmkindik beredi. Normatıvtik-quqyqtyq bazaǵa, aqparattyq júıelerdiń daıyndyǵyna, medısınalyq qyzmet tutynýshylaryn esepke alýǵa, satyp alý jáne tóleý ádisterin jetildirýge erekshe mán beriledi.
Sondaı-aq, Qaraǵandy oblysynda synamaly joba aıasynda Saqtandyrý baǵdarlamasy aprobasııalanady, ol mindetti medısınalyq saqtandyrý júıesinde emdelýshiniń mártebesin anyqtaýǵa múmkindik beredi.
Densaýlyq saqtaý mınıstrliginiń málimetinshe, jobany basqarýǵa 2,3 mlrd teńge bólingen. Bul qarjy 175 myńnan astam adamǵa júrek-qantamyr júıesi, qant dıabeti, glaýkoma jáne vırýstyq gepatıt aýrýlaryn erte anyqtaý úshin aldyn alý tekserýler júrgizý úshin jetkilikti. Sonymen qatar, ınsýlt, ınfarkt, aýyr jaraqat nemese kúrdeli ota jasaǵan adamdar úshin medısınalyq ońaltý qyzmeti usynylady.
Mindetti medısınalyq saqtandyrý júıesin engizý saqtandyrýdyń bolýy nemese bolmaýyna qaramastan, barlyq azamattarǵa kórsetiletin qoljetimdi tegin medısınalyq qyzmetterdiń kúshin joımaıdy. Mundaı qyzmetter qataryna jedel járdem shaqyrý, aýrýhanaǵa shuǵyl jatqyzý jáne basqalary enedi. Tegin medısınalyq kómektiń kepildik berilgen kólemi aıasynda Qaraǵandy oblysynyń turǵyndaryna jylyna 5,6 mln teńgeniń qyzmeti kórsetiledi dep josparlanǵan.
Aıta ketý kerek, búgingi kúnde Qaraǵandy oblysy boıynsha jumys isteıtin 549 myń azamat mindetti medısınalyq saqtandyrý júıesine jarna tóledi. Tólemderdiń jalpy somasy 15,4 mlrd teńgeni quraıdy.
Jıyn barysynda oblys ákimi Erlan Qoshanov jobany iske asyrý daıyndyǵynyń tyńǵylyqty júrgizilip jatqanyn jetkizdi.
– Sıfrlandyrýdyń joǵary deńgeıi qamtamasyz etilgen, barlyq turǵyndardyń elektrondyq densaýlyq tólqujaty bar. Sondaı-aq, keı jaǵdaıda bıznesti tarta otyryp densaýlyq saqtaý nysandaryn jyldamdata jańǵyrtý júrgizilýde. Biz medısınalyq kadrlardyń jetispeýshiligi máselesin maqsatty túrde sheshýdemiz. Aǵymdaǵy jyly 500-ge jýyq jas maman keledi dep kútip otyrmyz. MÁMS júıesinde azamattardyń mártebesin tolyq ózektendirý júrgizildi, oblys turǵyndarynyń 2%-in jumyldyrý ǵana qaldy, – dep baıandady óńir basshysy.
Qaraǵandy oblysy