Qazaqstannyń Birikken Arab Ámirlikterindegi Elshisi Madııar Meńilbekov BAÁ Premer-Mınıstriniń orynbasary, Prezıdent isteri jónindegi mınıstri sheıh Mansýr ben Zaıd Ál Nahaıanmen kezdesti dep habarlaıdy egemen.kz tilshisi QazAqparatqa silteme jasap.
«Kezdesý barysynda aldaǵy ýaqytqa josparlanǵan is-sharalar men joǵary deńgeıdegi saparlarǵa qatysty máseleler talqylandy. Onyń ishinde Ábý-Dabıde qyrkúıek aıynda ótetin Úkimetaralyq komıssııanyń kezekti otyrysyn ótkizýdiń, sondaı-aq, áriptestikti odan ári arttyrý joldaryn izdestirýdiń mańyzdylyǵy atap ótildi.
Elshi qazaqstandyq taraptyń ınvestısııalar salasynda ózara qol jetkizilgen ýaǵdalastyqtardy iske asyrýǵa qoldaý kórsetýge daıyn ekendigin qaıta rastady. Osy rette, Atyraý oblysyndaǵy polıetılen óndirý kesheni jobasynyń qazirgi jaǵdaıy talqylandy. Sondaı-aq Nur-Sultan qalasyndaǵy «Ábý-Dabı Plaza» kesheniniń elorda kúnin toılaý qarsańynda resmı ashylyp, qoldanysqa berilýi eki el úshin aýqymdy tarıhı oqıǵalardyń biri bolatyny aıtyldy» delingen QR Syrtqy ister mınıstrliginiń aqparatynda.
Sonymen qatar, taraptar mádenı-gýmanıtarlyq jáne bilim salasyndaǵy yntymaqtastyqtyń qarqyndy damýyn atap ótken.
Osyǵan oraı, qazaqstandyq Elshi bıyl Nur-Sultan qalasyndaǵy №84 mektep-lıseıinde sheıh Fatıma bınt Mýbarak atyndaǵy arab tilin oqytý ortalyǵynyń ashylǵanyna jáne Qazaqstannyń úzdik oqýshylaryna Ámirlikter joǵary oqý oryndaryna grant bólgeni úshin alǵysyn bildirdi.
Aıta keteıik, taıaýda «Ábý-Dabı Plaza» kesheniniń qurylysyn júrgizip jatqan kompanııanyń bas dırektory Elıas M. Dıb Tengrinews.kz tilshisine nysannyń qurylysy kezeń-kezeńmen júrip jatqanyn aıtqan bolatyn.
"2019 jyldyń ortasynda saýda oryndary men qonaqúılerdi paıdalanýǵa berý josparlanyp otyr. Iаǵnı, biz bastapqyda qonaqúıdi, keıinnen saýda oryndaryn, sosyn ǵana qalǵan bloktardy paıdalanýǵa beremiz. Jalpy qurylys jumystarynyń barlyǵy 2019 jyldyń sońynda aıaqtalady dep josparlaımyz" dedi "ALDAR Evro Azııa" JShS bas dırektory Elıas M. Dıb.
Onyń aıtýynsha, eń bıik ǵımarat kesheniniń qurylysy shamamen 2020 jyly aıaqtalady.
"R dep atalatyn blok keshenniń eń bıik ǵımaraty bolady, ony salýǵa kóp ýaqyt ketedi. Ony naqty qaı ýaqytta paıdalanýǵa beretinimizdi aıta almaımyn. ...Bıiktigi boıynsha 78 qabat bolady" dedi kompanııadaǵylar.
Eske sala ketsek, "Ábý-Dabı Plaza" qurylysy 2010 jyldyń qarashasynda bastalǵan bolatyn. Osyǵan deıin nysandy salýǵa 1,6 mıllıard dollar jumsalatyny aıtylǵan edi.