Búgin Syrtqy ister mınıstri Beıbit Atamqulov Grekııa Elshisi Aleksandros Katranısti Qazaqstan Respýblıkasyndaǵy mıssııasynyń aıaqtalýyna oraı qabyldady. Kezdesý barysynda SIM basshysy A.Katranıske ekijaqty baılanystardy nyǵaıtýǵa qosqan eleýli úlesi úshin alǵysyn bildirip, oǵan estelik syılyq tabys etti. Bul týraly mınıstrliktiń baspasóz qyzmeti habarlady.
Kezdesýde Grekııaǵa qazaqstandyq halyqaralyq bastamalarǵa qoldaý kórsetkeni úshin, sondaı-aq halyqaralyq arenada ózara tıimdi ózara is-qımyldy odan ári damytý nıetteri úshin rızashylyǵyn bildirdi.
SIM basshysy Grekııa Qazaqstannyń Ońtústik Eýropadaǵy mańyzdy áriptesi bolyp tabylatynyn atap ótti, grek Parlamenti men Úkimetiniń jańa quramynyń saılanýymen quttyqtap, ekijaqty yntymaqtastyqtyń odan ári jemisti damýyna úmit bildirdi.
Taraptar ekonomıkalyq jáne tehnologııalyq yntymaqtastyq jónindegi qoldanystaǵy úkimetaralyq komıssııa sheńberinde shart-quqyqtyq bazany keńeıtý jáne jumystyń jańa perspektıvalyq baǵyttaryn aıqyndaý qajettigin atap ótti.
Grekııa Elshisi Qazaqstan basshylyǵyna qazaqstan-grek yntymaqtastyǵyn nyǵaıtý isindegi tıimdi ózara is-qımyl jáne onyń qyzmetine qoldaý kórsetkeni úshin alǵysyn bildirdi.
Mınıstr grek áriptesine aldaǵy qyzmetine tabys tilep, A. Katranıs bizdiń elde árqashan qalaýly qonaq bolatynyn atap ótti.
Qazaqstan men Grekııa arasyndaǵy dıplomatııalyq qatynastar 1992 jyldyń 1 qazanynda ornatyldy. Qazaqstannyń Grekııamen syrtqy saýda aınalymy 2018 jyly 1,2 mlrd. AQSh dollaryn qurady (eksport – 1,1 mlrd., ımport - 19,3 mln.).
HH ǵasyrdyń 30-shy jáne 40-shy jyldary Qazaqstan myńdaǵan qýǵyn-súrginge ushyraǵan grekterdi qabyldady. Qýǵyn-súrginge ushyraǵandardyń urpaqtary Qazaqstanda grek dıasporasy bolyp tabylady.