Qazaqstan Respýblıkasynyń Syrtqy ister mınıstrligi BUU Qarýsyzdaný máseleleri jónindegi basqarmasymen (UNODA) birlesip, barlyq ıadrolyq qarýdan azat aımaqtar (IаQAA), qyzyǵýshylyq tanytqan halyqaralyq jáne óńirlik uıymdar, baqylaýshy memleketter ókilderiniń qatysýymen ıadrolyq qarýdan azat aımaqtar arasynda yntymaqtastyqty nyǵaıtýǵa arnalǵan semınar ótkizýde. Bul týraly mınıstrliktiń baspasóz qyzmeti habarlady.
Is-sharanyń ashylýynda sóılegen sózinde Syrtqy ister mınıstriniń orynbasary Erjan Ashyqbaev Tuńǵysh Prezıdent – Elbasy Nursultan Nazarbaevtyń ıadrolyq qarýdan azat aımaqtar arasynda dıalog qalyptastyrý bastamasyn ilgeriletýdegi rólin jáne Qazaqstannyń BUU Bas Hatshysy Antonıý Gýterrıshtiń Qarýsyzdaný jónindegi kún tártibin iske asyrýǵa qosqan úlesin atap ótti. Sondaı-aq halyqaralyq qaýipsizdik úshin jahandyq qaýip-qaterlerdiń kóbeıýi jaǵdaıynda IаQAA qatysýshy-memleketter arasyndaǵy yntymaqtastyqtyń mańyzdylyǵyna nazar aýdaryldy.
Osy rette qazaqstandyq dıplomat elimizdiń jahandyq antııadrolyq qozǵalys kóshbasshylarynyń biri retinde ıadrolyq qarýdan azat aımaqtardy nyǵaıtýdy jáne olardyń geografııasyn keńeıtýdi qoldap kelgendigi týraly jarııalady.
Semınar jumysyna ıadrolyq qarýdan azat aımaqtar, olardyń arasynda Afrıkalyq (Pelındaba kelisimi), Latyn Amerıkalyq (Tlatelolko kelisimi), Ońtústik-Tynyq muhıt (Rarotonga kelisimi), Ortalyq Azııalyq (Semeı kelisimi) jáne Ońtústik-Shyǵys Azııalyq (Bangkok kelisimi) aımaqtary ókilderi qatysýda.
Is-shara Semeı ıadrolyq synaq alańynyń jabylýynyń tarıhı kúni bolyp tabylatyn 29 tamyzda, álemdik deńgeıde atalyp ótetin Iаdrolyq synaqtarǵa qarsy is-qımyldardyń halyqaralyq kúnimen ushtastyrylǵan. Qazaqstannyń óz aýmaǵynda osyndaı is-sharany uıymdastyrý týraly sheshimi Tuńǵysh Prezıdent – Elbasy N.Nazarbaevtyń bastamasyna negizdeledi, ol elimizdiń atalǵan is-sharany júzege asyrý nıeti týraly 2017 jylǵy 29 tamyzda, AEHA Tómen baıytylǵan ýran banki ǵımaratynyń ashylý rásiminde jarııalaǵan bolatyn.
Semınarǵa qatysýshylar, buǵan deıin qurylǵan jáne jańadan paıda bolatyn zonalar arasyndaǵy uzaq merzimdi saıası yntymaqtastyqtyń naqty mehanızmderin qalyptastyrý maqsatynda, ıadrolyq qarýdan azat aımaqtardy ınstıtýsıonalızasııalaýdyń birlesken josparlaryn talqylaýdy josparlap otyr.