Bul týraly Mádenıet jáne sport mınıstrliginiń baspasóz qyzmeti habarlady.
«Mádenıet jáne sport mınıstri Aqtoty Raıymqulovanyń buıryǵymen Aqan Ábdýálıev T. Júrgenov atyndaǵy óner akademııasynyń rektory bolyp taǵaıyndaldy», - delingen resmı habarlamada.
Aqan Jylqyshybaıuly Ábdýálıev 1975 jyly týǵan. Qurmanǵazy atyndaǵy Qazaq Ulttyq Konservatorııasyn jáne Almaty ekonomıka jáne statıstıka akademııasyn bitirgen. Eńbek jolyn Súıinbaı atyndaǵy Almaty oblystyq fılarmonııasynyń jeke oryndaýshysy bolyp bastaǵan. Ár jyldary «Qazaqkonsert» RMQK-da aspapta jeke oryndaýshy, J.Elebekov atyndaǵy estrada-sırk kolledji men Qurmanǵazy atyndaǵy qazaq ulttyq konservatorııasynyń oqytýshysy, A.Jubanov atyndaǵy respýblıkalyq mektep ınternaty dırektorynyń orynbasary, dırektory, Jambyl atyndaǵy Qazaq memlekettik fılarmonııasynyń dırektory laýazymdaryn atqarǵan. 2016 jyldyń maýsym aıynan - Almaty oblysynyń Mádenıet, arhıvter jáne qujattama basqarmasynyń basshysy, 2018 jyldan bastap – Almaty oblysy ákiminiń orynbasary bolǵan.