Bári esimde. Biz bir qıyrdaǵy «Qoǵaly» atty aýylda turdyq. Es biler aǵalar soǵysqa attanyp ketken. Kolhozdyń bar jumysyn shal-kempir atqardy. Aýyl balalary bolyp oınaýdy bilmedik. Buǵanamyz qatpaı bıdaıdyń masaǵyn terdik, taryny torǵaıdan qorydyq. Toıyp tamaq ishpedik.
Búgin oılap qarasam, bári ertegi sekildi. Men es bilgeli aýylda úsh hat tasýshy boldy. Soǵys bastalarda Seıtqasym, odan soń Sopynyń Ábdildasy, Rústem ata kún qurǵatpaı Qyzylordaǵa jaıaý-jalpylap, búkil gazet-jýrnaldy, hatty dorbaǵa salyp, aýylǵa arqalap jetkizetin. Naǵyz jankeshti eńbek hat tasýshylarda edi-aý!
Biz «Sosıalıstik Qazaqstan» gazetin bala kezden jata-jastanyp oqydyq. Ata-analarymyz jumystan oralǵan kezde syǵyraıǵan shamnyń jaryǵymen ár betin oqyp beretinbiz. Sodan soń boı jazyp, shaıǵa otyratyn. Kún saıynǵy «Informbıýronyń» habaryna sol kezde «Sosıalıstik Qazaqstan» gazetinen qanyǵatyn edik. Maıdanger aǵalardyń erligin, jazǵan hattaryn gazetten oqyp, tógilgen qóz jasymyzdy jıi súrtetinbiz.
Bala kezden janymyzǵa jaqyn basylymǵa búginde júz jyl tolyp otyr. Alǵashqy sany Orynborda, odan soń Qyzylordada shyqqanyn maqtanysh etemiz. Daýylpaz aqyn Sáken Seıfýllın basylymnyń taralymy bes myńǵa jetkende Alataýdyń baýraıyna kıiz úı tikkizgeni, mereke ótkizgenin tarıh betterindegi shejireden oqyǵanbyz.
Alystaǵy aýylda otyryp, «Sosıalıstik Qazaqstannyń» basynan ótken talaı oqıǵalardy estýshi edik. Redaktor Q.Sháripov bir jınalysta «Sosıalıstik Qazaqstan» «Kazahstanskaıa pravdanyń» qosymshasy bolýyn qoldaımyn dep, dep joǵarǵy bıliktiń yǵyna kóshkisi kelgende qaıratker Jumabek Táshenov «Sosıalıstik Qazaqstandy» jabatyn da, ashatyn da sen emes» dep toıtarys berdi, gazetti japtyrmady degennen de habardarmyz. Gazette redaktor bolǵan Balǵabek Qydyrbekuly Kolbınniń tapsyrmasyn oryndamaı, D.Qonaev jaıynda synı maqala jazýǵa qarsy shyǵyp, óz aryzymen qyzmetten ketipti. Osyndaı qaıratker aǵalardyń arqasynda basylym búginge jetti ǵoı.
Meniń de jasym toqsanǵa qaraı bet burdy. Bas basylym meniń bala kezden bergi syrlasym. Jetpis jyldan astam ýaqyt boıy bir sanyn qur jibermegen shyǵarmyn. Qoıyn dápterimde bári jazýly. Jaqsy dúnıeler shyqsa tulparǵa mingendeı qýat alamyn.
Qazir «Egemen» qolǵa jyldam tıetin boldy. Dereý betterge sholý jasaımyn, jaqsy dúnıelerdiń astyn syzyp, utymdy sózderdi jazyp alamyn. Basylymda qalamgerler M.Joldasbekov, E.Raýshanov, R.Seısenbaev, B.Bodaýbaı, J.Súleımenov, Q.Sársenbaı, qazirgi qalamy ushqyr jýrnalıster Názıra Járimbet, Farıda Byqaı, Súleımen Mámet, Aleksandr Tasbolat, Aıgúl Ahanbaıqyzy jáne taǵy basqalardyń jazǵanyna qumarta kóz tigemiz. Basylym basshysy Darhan Qydyráliniń tanymdyq dúnıelerine sýsyndap qalamyz.
Biz aǵa býyn basylymnyń baǵyn jandyrǵan Sherhan Murtaza, Sapar Baıjanov, Uzaq Baǵaevtardy jıi eske alamyz. Keshegi Erjuman Smaıyldyń, Aqseleý Seıdimbektiń, Núrıden Mýftahtyń qalam siltesin ańsaıtyn boldyq.
«Egemen» ár sózdi baısaldy, baıypty aıtady, sol úshin de onyń bedeli joǵarylaı túsýde. Ár shańyraq basylymǵa úzbeı jazylsa utady. Aǵa býynnyń yqylasy bólek.
Syr Alashtyń anasy. «Egemenge» jylma-jylǵy jazylý jaǵynan kósh bastaýshy bolýǵa tıis. Qaımaǵy buzylmaǵan qazaqy óńirde on-on bes myń taralym az. Ne isteý kerek? Basylym jýrnalısteri jıi-jıi elge shyǵyp, kezdesýdi jıiletý kerek. Kitaphana, mektepterde syrlasý kóbeıse deımin. Aǵa býyn ókilderi jıi syr aǵytsa artyqtyq etpes edi. «Meniń «Egemenim» atty baıqaý qajet-aq. Ákimdikterden qoldaý kóbeıse. Munaı kompanııalary, poshta bólimsheleri, basylym janashyrlarymen kezdesýlerdi jıiletý kerek.
Basylymǵa aldaǵy jylǵa jazylý naýqany bastalǵaly tur. Bizder, sol naýqannyń basy-qasynda júrýdi paryz tutýǵa bel býǵaly otyrmyz.
Qaıyrbek Myrzahmetuly,
ardager
Qyzylorda