Grek-rım, erkin jáne áıelder kúresi boıynsha 2019 jylǵy álem chempıonatynyń uıymdastyrýshylary jahandyq birinshiliktiń jeńimpazdary men júldegerlerine beriletin medaldardyń dızaınyn tanystyrdy.
Nur-Sultanda ótetin kúres túrlerinen álem chempıonatynyń uıymdastyrýshylary medaldardy standartty dóńgelek pishinde jasaýdan bas tartyp, úshburysh túrinde jasap shyqty. Bul – kúrestiń úsh túriniń birtutastyǵyn bildiredi.
Álem chempıonaty uıymdastyrý komıtetiniń tóraǵasy Erlan Qojasbaıdyń sózinshe, medaldyń aldyńǵy jaǵynda Qazaqstan astanasynyń basty kórnekti jeri – «Báıterek» monýmenti men álem chempıonatynyń logotıpi beınelengen. Al logotıptiń ortasyndaǵy syzyqtar kúres ádisin bildiredi. Medaldyń syrtynda kúresten bıylǵy álem chempıonatynyń sımvoly sanalatyn qar barysy beınelengen.
Eske sala keteıik, grek-rım, erkin jáne áıelder kúresinen álem chempıonaty 14-22 qyrkúıek aralyǵynda Nur-Sultan qalasynda ótedi. Elordada ótetin baıraqty báseke kúres túrlerinen 2020 jyly Tokıoda ótetin Olımpııa oıyndaryna joldama berýshi alǵashqy týrnır bolmaq. Dúnıe júziniń 100 elinen keletin 1002 balýan bir apta boıy Nur-Sultandaǵy «Barys Arena» muzsaraıynda beldesetin bolady.