Mal mamandary Aqqaıyń aýdanynyń Toqshyn aýylynda 9 sıyrdyń belgisiz indet aýrýyn juqtyrǵanyn anyqtaǵan. Turǵyndar Zeńgibaba túliginiń denelerinde belgisiz isikter paıda bolyp, aıaqtaryn basa almaı qalǵanyn baıqap, dabyl qaqqan.
Osy oqys oqıǵaǵa baılanysty BAQ ókilderimen ótkizgen brıfıngte oblystyq veterınarııa basqarmasy basshysynyń mindetin atqarýshy Berik Áljanov aýyldyń bar maly aty jaman keselge shaldyqty degen qaýesetti joqqa shyǵardy. Bastapqyda «nodýlıarlyq dermatıt» degen dıagnoz qoıylǵanymen, rastalmaǵan. «Jurt shýlap júrgendeı dermatıt emes, teri qabynýy dertin juqtyrýy yqtımal. Qazir ár aýlanyń malyna vaksına egilýde», dedi ol.
Aýrýdyń paıda bolýyna aýyldyq okrýgtiń dárigerin kinálaýshylar da joq emes. Olardyń paıymynsha, kóktemge salym qajetti ekpe sharalary júrgizilmegen kórinedi. Zań buzýshylyq anyqtalǵan jaǵdaıda ol ákimshilik jaýapkershilikke tartylyp, 125 aılyq eseptik kórsetkish kóleminde aıyppul tóleýi múmkin.
Mundaı belgisiz indet óńirimizde buryn-sońdy tirkelmegen. Keseldiń naqty emi tabylǵansha et pen sútti tutynýǵa jáne satýǵa tyıym salynǵan.
B.Áljanov qobaljýǵa esh negiz joǵyn, jaǵdaı baqylaýda turǵanyn, dert ýshyǵatyn bolsa, jedel túrde bıologııalyq saraptama alynyp, laboratorııalyq zertteýge jiberiletinin jetkizdi.
Aýyl turǵyndary maldar antıbakterııalyq preparattarmen emdelgendikten, qazir laboratorııalyq zertteýlerdiń múmkindigi joqtyǵyna alańdaýly. Jumbaq aýrý taralyp ketpese, densaýlyǵymyzǵa zııanyn tıgizbese eken deıdi.
Soltústik Qazaqstan oblysy