Prezıdent Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna arnaǵan Joldaýyn qoǵam belsendileri qyzý talqylaýda. Tarıhshy, ustaz О́mir Shynybekuly Facebook paraqshasynda Joldaýǵa qatysty pikirimen bólisken.
«Memleket basshysy Qasym-Jomart Toqaevtyń Qazaqstan halqyna Joldaýyndaǵy ózim úshin eń mańyzdy degenderin túrtip qoıdym.
- Elimizdiń qoǵamdyq-saıası ómirin jańǵyrtpaı, tabysty ekonomıkalyq reformalardy iske asyrý múmkin emes. Bul – bizdiń ustanatyn basty qaǵıdatymyz.
- Konstıtýsııaǵa sáıkes azamattarymyzdyń óz oıyn erkin aıtýǵa quqyǵy bar.
Eger beıbit aksııalar zańnyń sheńberinen shyqpaıtyn jáne azamattarymyzdyń tynyshtyǵyn buzbaıtyn bolsa, buǵan túsinistikpen qarap, jıyndardy ótkizý úshin arnaıy oryn bólý qajet. Mundaı oryndar qalanyń shetinde bolmaýy tıis.
- Quqyq qorǵaý júıesin tolyq reformalaý – asa mańyzdy mindetterdiń biri.
- Indýstrııalandyrýdyń úshinshi besjyldyǵyn júrgizý barysynda jiberilgen barlyq qatelikterdi, olqylyqtardy eskerýimiz kerek.
- Bizdiń memlekettik kompanııalar iri konglomerattarǵa aınaldy. Biraq olardyń halyqaralyq básekege qabilettiligi kúmán týdyrady.
Memlekettiń ekonomıkaǵa orynsyz aralasýyn azaıtý maqsatymen kvazımemlekettik kompanııalar qurýǵa moratorıı engizý jóninde sheshim qabyldadym.
- Biz shaǵyn eldi mekenderdi damytýǵa qatysty óte kúrdeli máseleni sheshýimiz qajet.
О́ńirlik standarttar ázirlendi. Endi olardy úsh myńnan astam negizgi jáne qanattas aýyldyq eldi mekenderge engizý qajet.
- Jalpy ishki ónim men halyq tabysynyń artýyna qaramastan, qoǵamdaǵy múliktik jiktelý úderisi saqtalyp otyr, tipti kúsheıip barady.
Bul – alańdatarlyq faktor. Sondyqtan oǵan erekshe nazar aýdarý kerek.
- Konstıtýsııa boıynsha bizdiń elimiz – áleýmettik memleket. Sondyqtan memleketimiz azamattar aldyndaǵy mindetterin oryndaýy tıis.
- Pılottyq joba retinde turǵyndar tarapynan jergilikti bılik jumysynyń tıimdiligin baǵalaý júıesin engizý qajet dep sanaımyn.
Mysaly, eger saýalnama nemese onlaın-daýys berý nátıjesinde turǵyndardyń 30 paıyzynan astamy qala nemese aýyl ákiminiń jumysyn tıimsiz dep eseptese, bul Prezıdent Ákimshiliginiń arnaıy komıssııa quryp, týyndaǵan máseleni zertteýine jáne tıisti usynym engizýine negiz bola alady.
- Iri qalalardyń turǵyndary kóbeıip kele jatqany baıqalady. Sonymen qatar, jańa turǵyndarǵa qolaıly jaǵdaı jasalǵan Pavlodar jáne Petropavl syndy qalalarda adamdar men eńbek resýrstarynyń tapshylyǵy bar.
Úkimet kóshi-qon úderisin basqarý úshin pármendi sharalar qabyldaýy tıis.
- Reformany tek reforma úshin júrgizýge jol berilmeıdi», dep jazady О́mir Shynybekuly.