Cárke batyr Ábilqaıyr hannyń senimdi serikteriniń, qaharman batyrlarynyń biri bolǵan. Onyń batyrlyǵyn Reseı patshalyǵy da moıyndaǵan. Máskeý men Peterbýrg arhıvterinde Sárke batyrdyń erligi týraly derekter kóptep kezdesedi. Batyrdyń memorıaldyq keshenin Aqtóbe oblysy, Qarǵaly aýdany Qos Estek aýylynda ornatý kezdeısoq emes, kezinde osy aýyldy Sárke batyr jaılaǵan.
«Rýhanı jańǵyrý» baǵdarlamasy aıasynda bıyl 7 qyrkúıekte ataqty Sárke batyrdyń arýaǵyna arnap quran baǵyshtalyp, is-shara ótkizilgeli otyr. Sharaǵa qatysýshylar Sárke batyrǵa arnalǵan kórmeni tamashalap, teatrlandyrylǵan qoıylymǵa kýá bolady. Sondaı-aq Sárke batyrǵa arnalǵan eńseli eskertkishtiń ashylýyna qatysady. Batyrǵa arnalǵan qazaq kúresinen týrnır men aıtys ta sharanyń abyroıyn asqaqtata túspekshi.
Sárke batyr
Ýa, qyzyl til, kem sóıleme, asyrma,
Sárke baba – Jaǵalbaıly sańlaǵy!
Oıran salǵan on segizinshi ǵasyrda,
Kishi júzdiń qol bastaǵan sardary!
Jońǵarlardyń darymaǵan san ýy,
Keýdesinde saqtaǵan-aý kek kiltin.
Júregine janyp alǵan qarýy,
Almas qylysh – janaryndaı ótkir-tin.
Ábilqaıyr qol bastasa qasqaıyp,
Bókenbaımen úzeńgiles turypty.
Janarynan kórgen emes jas taıyp,
Sárke batyr – baba bıik rýhty!
Ańyraqaı – jońǵar qyrǵan shaıqasta,
Sárke, Eset, Bókenbaıdaı er júrek,
Jeńdi Rýhy, basym bolyp aıqasta,
«Kúsh – birlikte» – jeńis týy jelbirep!
Baýyr sózi shyn batyrdy esti etpek,
Sárke dos qyp «qaıyr» degen uǵymdy.
Qalmaq qýǵan elý myńdaı estek kep,
Shapanynyń shalǵaıyna tyǵyldy.
Estekterdiń keıbireýin toqtatyp,
Sulý jerde Sárke batyr turdy iri!
Alǵash túsken estekterdiń qonysy,
Qos Estek dep atalady bul kúni.
Jaǵalbaıly batyr týdy, asyl baq,
Sárke batyr – qaıqy qylysh ıesi.
Urpaqtardyń qona bersin ǵasyrlap,
Boılaryna batyrlyqtyń kıesi!
Eldiń erin tarıh áste umytpas,
Ulttyń tili, dili bolǵan urany.
Alashpenen jan-taǵylymy rýhtas,
Sárke batyr – jadymyzda turady!
Serik Kákimǵalıuly SARIN