Syrtqy ister mınıstrliginde Mınıstrdiń birinshi orynbasary Muhtar Tileýberdi Japonııa Parlamenti О́kilder palatasynyń depýtattarymen kezdesti. Bul týraly mınıstrliktiń baspasóz qyzmeti habarlady.
Kezdesý barysynda taraptar ekijaqty jáne kópjaqty formatta jemisti áriptestikti atap ótip, saıası, parlamentaralyq, saýda-ekonomıkalyq jáne ınvestısııalyq salalardaǵy qazaqstan-japon yntymaqtastyǵynyń damý qarqynyna erekshe mán berdi.
M. Tileýberdi japondyq tarapty Qazaqstanda bolyp jatqan saıası jáne áleýmettik-ekonomıkalyq ózgeristermen tanystyryp, Nur-Sultan men Tokıo arasyndaǵy qarym-qatynastardy jandandyrýǵa shaqyrdy. Oǵan qosa, elimizde japondyq bıznesmenderge qolaıly jaǵdaı jasaýǵa barlyq múmkinshilikter bar ekendigin aıtty.
Japonııanyń О́kilder palatasynyń depýtaty Fýmııakı Kobaıası Qazaqstannyń Ortalyq Azııadaǵy kóshbasshylyq róline basa nazar aýdara otyryp, bolashaqta eki el arasynda tabıǵı resýrstardy ıgerý, qorshaǵan ortany qorǵaý, bıznes baılanystardy keńeıtý, aýylsharýashylyq jáne ınfraqurylymdyq jobalardy iske asyrý salasynda yntymaqtastyq ornatýǵa qyzyǵýshylyq tanytyp otyrǵandyǵyn málimdedi.
Sonymen qatar japon tarapy Almaty qalasynyń baı tabıǵatynyń keń múmkinshilikterine toqtap, qazaqstandyq týrızmdi ilgeriletýge úlken áleýet bar ekenin alǵa tartty.