Egemendigimizdiń eleń-alań shaǵynda Sansyzbaı Jumabekovtiń aýdandyq «Qazaq tili qoǵamyn qurýǵa, balabaqsha ǵımaratyn qazaq mektebine, elevatordyń jataqhanasyn meshit úıine aınaldyrýǵa, orys mektepterinde qazaq synyptaryn ashýǵa bastamashy bolǵanyn, salt-dástúrlerimizdiń jańǵyrýyna súbeli úles qosqanyn jerlesteri umyta qoıǵan joq.
Týǵan tiline naǵyz janashyr bola bilgen aqsaqal jetpistiń tórine ozsa da, ulttyq ustanymynan aınyǵan emes. Onyń ólke tarıhyn zertteýdegi eńbegi erekshe atap ótýge turarlyq. Ásirese jurtshylyq jadynan umytylyp, esimi ábden kómeskilenip qalǵan Jansúgir babasy jaıly kózdiń maıyn taýysyp, tirnektep jınaǵan derekteri aýyz toltyryp aıtarlyqtaı.
Jansúgir Baýbekuly týraly alǵash sanaly ǵumyryn shákirt tárbıesine arnaǵan Moldahmet Suraǵanov aqsaqaldan estipti. Ardager ustaz onyń Qojabergen, Bógenbaı batyrlardyń jasaǵy quramynda qalmaqtarǵa qarsy joryqtarǵa qatysyp, myńbasy dárejesine deıin kóterilgenin, erjúrektiligimen, sheshendigimen kózge túskenin zerdesine ábden quıǵan tárizdi. Jaryqtyq kózi tirisinde zıratyna belgi ornatsam degen armanyna jete almaı ketipti. Marqumnyń júktegen amanatyn aǵamyz adal oryndap shyqqan.
«Qyzyl ımperııanyń solaqaı saıasaty kezinde júrek jutqan bahadúr jerlengen oba basynda eleýsizdeý ǵana belgi turatyn. El ishindegi áńgimelerge, quıma qulaq qarııalardyń aıtýlaryna qaraǵanda, Qoıly Atyǵaıdan taraıtyn Jansúgir 1690 jyldary týyp, 1760 jyldary dúnıe salǵan. Jastaıynan batyrlyǵymen kózge túsip, Andyǵoja, Qaraman, Myrzataı, Sarybaı sııaqty úzeńgiles dostarymen birge qazaq jerin jaýdan tazartýǵa qatysqan. El basqarý isine de aralasyp, aýzy dýaly, sózi ýáli bı bolǵan. Batyrdyń máńgilik tynystap jatqan jerine záýlim eskertkish turǵyzý týraly usynysymdy aýyl bolyp qoldap, qal-qaderinshe kómek berdi», deıdi Sákeń.
Iá, byltyr Aralaǵash aýylyna taqaý tusta Petropavl – Astana baǵytyndaǵy kúre joldyń boıyna alystan birden kózge shalynatyn bıiktigi 15 metrlik appaq keseneniń turǵyzylýyna agroqurylym basshylary Birjan Shaımerdenov pen Eltaı Zikirın qarjylyq-demeýshilik kórsetipti. «Rýhanı jańǵyrý» baǵdarlamasy aıasynda qolǵa alynǵan qaıyrymdylyq sharaǵa eki atpal azamat 28 mıllıon teńge bólip, mármár tastar men qurysh qoldy sheberlerdi Aqtaýdan aldyrtypty. «Bir adamnyń batyldyǵy myń adamǵa jol salǵan, bir adamnyń batyrlyǵy tutas halyqtyń atyn shyǵarǵan» degen osy!
Soltústik Qazaqstan oblysy,
Aqqaıyń aýdany