Aqtóbelikter elimizdiń taıaý jyldardaǵy damý baǵyttaryn taıǵa tańba basqandaı belgilep bergen respýblıka Prezıdenti Qasym-Jomart Toqaevtyń Qazaqstan halqyna Joldaýyn úlken serpilis ústinde talqylaýda. Osy oraıda sársenbiniń sátti kúni ótkizilgen Aqtóbe oblystyq aktıvi múldem jańasha formatta boldy.
Ádette buǵan deıingi talqylaýlarda belgili bir óńir basshysy baıandama jasap, Joldaýda qoıylǵan tapsyrmalar men mindetterdi taǵy bir tizbektep shyǵatyn edi de, bul tásil Memleket Basshysynyń kóshirme sózindeı áser qaldyratyn. Al bul joly bulaı bolmady. Aqtóbe oblysynyń ákimi Ońdasyn Orazalın aktıv jınalysyn ashyp, Prezıdenttiń Joldaýynda aıtylǵan oı-tujyrymdar halyqtyń kókeıinde júrgen máselelermen ushtasyp, úılesim tapqanyna qysqasha toqtalyp ótti. Sodan soń óńir basshysy aktıvke qatysýshylardyń ózderine sóz berip otyrdy. Rasynda da bıyl saılanǵan Qazaqstan Prezıdentiniń elge jarııalaǵan tuńǵysh Joldaýynyń «Syndarly qoǵamdyq dıalog – Qazaqstannyń turaqytylyǵy men órkendeýiniń negizi» dep atalýy tekten-tek bolmasa kerek. Tek bir jylǵa ǵana emes, sonymen birge memleketimizdiń taıaýdaǵy prespektıvalaryna tereń taldaýlar jasaǵan Joldaýdyń ón boıyna tabysqa jetýdiń basty kilti – qoǵamdaǵy turaqtylyq ekeni ózek bolyp tartylǵan.
Joldaýdaǵy eń basty mindetterdiń biri qoǵam músheleriniń bılikke degen senimin kúsheıtý ekendigi de aıqyn kórinedi. Iаǵnı bılik turǵyndar úshin ashyq, qoljetimdi bolǵan jaǵdaıda ǵana el-jurttyń senimine ıe bola alady. Oblys aktıvine qatysýshylar Prezıdent Joldaýynyń osyndaı ereksheligine ekpin túsire sóıledi. Oblys ákimdiginde buǵan deıin de nebir mártebeli basqosýlar ótkizilip keledi. Alaıda sonyń kópshiligine el-jurt pen turǵyndardyń qalyń toptary, qoǵamdyq ómirdiń san alýan salalarynda qyzmet atqaratyn elge syıly azamattar men eńbek ardagerleri, úkimettik emes uıymdar men etnomádenı qaýymdastyqtyń ókilderi qatynasqan irgeli jıyndar bola bermeıtini de jasyryn emes.
Aqtóbede Prezıdent Joldaýyn talqylaǵan aktıv ótkizilgen kezde ákimdik ǵımaratynyń 600 oryndyq úlken zaly halyqqa lyq toldy. Ári sonyń deni Joldaýda Memleket Basshysy Qasym-Jomart Toqaev qoıǵan mindetterge baılanysty óz oı-pikirlerin tolyqaıtyp jetkizýge múmkindik aldy. Árıne bul arada Joldaýdy talqylaýǵa baılanysty ortaǵa tastaıtyn oı-pikirlerin aldyn-ala júıelep kelgen spıkerlerdiń bolǵanyn joqqa shyǵara almaımyz. Bir esepten osylaı bolýy qajet te. Bul rette Aqtóbe oblystyq máslıhatynyń depýtaty Amangeldi Esirkepov pen Q.Jubanov atyndaǵy Aqtóbe óńirlik memlekettik ýnıversıtetiniń rektory Baýyrjan Erdenbekovtiń jáne Yrǵyz aýdanyndaǵy «Naýryz -Sım» JShS-niń dırektory Ibragım Sársenbaevtiń Joldaýda qoıylǵan mindetterdi iske asyrýǵa baılanysty qozǵaǵan oı-pikirleri kópshiliktiń oıyn dóp basqanyn aıtýǵa tıispiz.
Buǵan qosa aktıv májilisinde aldyn-ala jaryssózge jazylmasa da óz usynys-tilekterin ashyq bildirgen turǵyndar da kóp boldy. Muny Prezıdent Joldaýynyń basty taqyrybyna aınalǵan syndarly qoǵamdyq dıalogtyń bir kórinisi dep qabyldaǵanymyz jón sekildi. Aıtalyq qoǵam belsendisi Jaıylbaı Estaı Prezıdent aıshyqtaǵan «Kúshti Prezıdent –yqpaldy Parlament –esep beretin Úkimet» ustanymyna baılanysty óz oı-pikirin ortaǵa tastady. Ol atalǵan úsh tuǵyrdy halyq pen bılik arasyndaǵy baılanysty tereńdetýge yqpalyn tıgize alatyn taptyrmas tetik dep esepteıdi. Aldymyzda Parlament jáne máslıhat depýtattarynyń saılaýy jaqyndap keledi. Osy jaýapty saıası naýqannyń qarsańynda saılaý komıssııalarynyń quramyn ózgergenin qalaımyz. Bul ádiletti saılaý ótkizýdiń basty joldarynyń biri dedi ol budan ári. Sondaı-aq J.Estaı jerdiń sheteldikterge satylmaıtyny, buǵan jol berilmeıtini jónindegi Prezıdent tujyrymyn qoldaıtynyn jetkizdi. Sonymen birge sheshen dál osy másele aldaǵy kezde tıisti normatıvtik-quqyqtyq aktilermen shegendelse, tipten oń bolatynyn alǵa tartty.
Budan keıingi kezekte táýelsiz ekolog Izimǵalı Kóbenov Prezıdenttiń ekologıalyq ahýaldy jaqsartý men qorshaǵan ortany qorǵaý jónindegi jumystardy jandandyrýǵa qatysty tujyrymyn tolyq qýattaıtynyn aıta kelip, zııandy qaldyqtar shyǵaratyn sheteldik basqarýshylardyń, sonyń ishinde qytaılyqtardyń basqarýyndaǵy kásiporyndardyń bir ólkege kóbirek shoǵyrlanýy durys emes ekenine ekpin túsirdi. Mysaly Aqtóbe óńirinde osyndaı jaǵdaı qalyptasyp otyr dedi ol.
О́ńirdegi shyǵarmashylyq tulǵalardyń biri aqyn Gúlimaı Qýanysheva memlekettik til mártebesin kóterýge baılanysty Prezıdent sózi eń birinshiden memleket quraýshy ultqa úlken jaýapkershilik júkteıtinin jetkizdi. Budan ári ol belgili bir basqosýlarda tek biryńǵaı «shtattaǵy sheshenderdiń» sóıleýi súreńsizdikke soqtyratynyn, bul kózqaras barshaǵa ortaq qoǵamlyq dıalog qaǵıdattarymen syıysa bermeıtinin aıtyp berdi.
Prezıdent Joldaýynda qoıylǵan mindetter men tapsyrmalar –iske basshylyq ekeni málim. Ony tıimdi túrde júzege asyrý úshin Aqtóbe oblysynda tómendegideı is-sharalar kesheni atqarylmaq. Memleket basshysy Joldaýda bıýdjetaralyq qatynastar júıelerin reformalaý qajettigin alǵa tartty. Bul baǵytta óńirde bıýdjet pen onyń shyǵystaryn qaıta qaraý qajettiligi týyndap otyr. Birinshiden onyń shyǵys bóligi áleýmettik salaǵa baǵyttalǵanda ǵana tıimdi bolary anyq. Buǵan qosa áleýmettik tólemder men jalaqynyń ýaqytynda tólený isinde de kidirister joq emes.
Aqtóbe sekildi irgeli óńirde kópbalaly jáne az qamtylǵan otbasylardy baspanamen qamtýdyń qosymsha joldary izdestirilse artyq bolmaıdy. Oblysta tıisti ınfraqurylymdardy jobalaý barysynda halyqtyń kóp shoǵyrlanǵan jerlerine nazar aýdarylyp, olardyń suranystaryn zertteýdiń mańyzy zor. Halyqtyń talap-tilekteri jerde qalmaýy úshin qoǵam múshelerimen dıalogty tereńdete otyryp, buǵan úkimettik emes uıymdar men qoǵamdyq keńesterdiń áleýetin paıdalaný kózdelgen. Osy arqyly jergilikti atqarýshy organdar Prezıdent Joldaýyna ispen jaýap berýdi kózdep otyr. Aktıv jınalysynyń qorytyndysy osyndaı oı túıýge negiz qalaıdy.