Jambyl oblysynda Qazaqstan Respýblıkasynyń Tuńǵysh Prezıdenti – Elbasy kitaphanasynyń «N.Nazarbaev: dáýir, tulǵa, qoǵam» atty kóshpeli kórme jobasy iske qosyldy. Kórme aıasynda áýeli Qordaı aýdany, Áljan ana aýylynyń Mádenıet úıinde Elbasy kitaphanasynyń kóshpeli ekskýrsııasy ótti. Saltanatty sharany Elbasy kitaphanasynyń dırektory, saıası ǵylymdardyń doktory, professor Ámirhan Rahymjanov sóz sóılep ashyp, jergilikti turǵyndardy «N.Nazarbaev: dáýir, tulǵa, qoǵam» kórme jobasymen tanystyrdy.
– Elbasy kitaphanasynyń qyzmetkerleri «Tuńǵysh» ekskýrsııalyq konsepsııasynyń aıasynda sizderge arnap «Tarıhı tańdaý» ǵylymı-ekspozısııalyq jobasyna taqyryptyq ekskýrsııalar daıyndady. Sizderge arnaıy Elbasy Nursultan Ábishuly men táýelsiz Qazaqstannyń damý tarıhynan syr shertetin derekti fılmderdiń kórsetilimi ótedi. Aýdan turǵyndarynyń nazaryna Elbasy kitaphanasynyń mýzeı qory men Elbasynyń jeke arhıvinen jasaqtalǵan «Elbasy jáne jańarǵan Jambyl ólkesi» fotosýretter kórmesi de usynylyp otyr, – dedi Ámirhan Rahymjanov.
О́z sózinde Jambyl oblysy ákiminiń orynbasary Sulýshash Qurmanbekova bul bastamanyń jergilikti halyqqa degen qurmet ekenin, sondyqtan árbir azamat Máńgilik Eldiń damýyna úles qosýdy ózine paryz sanaý kerektigin aıta kelip, Elbasy kitaphanasynyń ujymyna alǵys bildirdi. Budan keıin Elbasy kitaphanasynyń dırektory Ámirhan Rahymjanov Qordaı aýdany ákiminiń orynbasary Beıqut Jamangózovke Alǵys hat pen «N.Nazarbaev. О́mirbaıan», «Nazarbaev modeli» kitaptaryn tabystap, Mádenıet úıiniń kitaphanasyna qundy basylymdardyń jınaǵyn tartý etti.
Áljan ana aýylynda «Tarıhı tańdaý. Bastaý», «Tarıhı tańdaý. О́rleý», «Qazaqstannyń sporttyq dańqy» taqyryptyq ekskýrsııalary uıymdastyryldy. Ekskýrsııa barysynda Qordaı aýdanynyń turǵyndary Elbasy ómirine qatysty sırek kezdesetin beınematerıaldardyń, fotosýretter men arhıv qujattarynyń jáne jádigerlerdiń biregeı keshenin tamashalady. Sonymen qatar, kórmege kelýshiler otandyq jáne sheteldik áıgili sportshylardyń Nursultan Nazarbaevqa tartý etken syılyqtary jáne marapattarymen tanysty. Ekskýrsııany tamashalaǵan mektep muǵalimi Araılym Qasymova el táýelsizdiginiń negizin qalaǵan tulǵanyń dara joly barlyq qyrynan mańyzdy oqıǵalar men parasatty sheshimderge toly ekenin, sonymen qatar búgingi kórme tarıhı qundy derekterdi kópshilikke usynýymen de baǵaly ekenin jetkizdi.
«N.Nazarbaev: dáýir, tulǵa, qoǵam» atty kóshpeli kórme jobasy Shý aýdanynda jalǵasyn tapty. Shý qalasyndaǵy Sáken Seıfýllın atyndaǵy orta mektepte kóshpeli kórme jobasynyń aıasynda aıtýly shara uıymdastyryldy. Atalǵan kórme sheńberinde Qazaqstan Respýblıkasynyń Tuńǵysh Prezıdenti – Elbasy kitaphanasy «Tuńǵysh» ekskýrsııalyq konsepsııasynyń negizinde kelýshiler «Tarıhı tańdaý Bastamasy» jáne «Tarıhı tańdaý. Umtylys», «Qazaqstannyń sporttyq dańqy» taqyryptyq ekskýrsııalaryn tamashalady.
Shara barysynda Elbasy kitaphanasynyń dırektory Ámirhan Rahymjanov, orynbasary Kúlaısha Aqtaeva, Jambyl oblysy ákiminiń orynbasary Sulýshash Qurmanbekova, aýdan ákimi Jarylqasyn Aıtaqov jınalǵandar aldynda sóz sóılep, Elbasynyń táýelsiz el tarıhyndaǵy qaıratkerlik qabiletine toqtaldy. О́z kezeginde Ámirhan Rahymjanov joba avtory, saıasattanýshy ǵalym, Qazaqstan Respýblıkasy Tuńǵysh Prezıdenti Keńsesiniń basshysy Mahmud Qasymbekovtyń sálemin jetkizip, aýdan ákimi Jarylqasyn Aıtaqov pen atalǵan mektep dırektory Jazıra Shalbaevaǵa Alǵys hat tapsyryp, Elbasy týraly qundy eńbekterdi syıǵa tartty. Budan keıin aýdan ákimi Jarylqasyn Aıtaqov ta óńirge kelgen meımandarǵa rızashylyǵyn bildirip, Elbasy kitaphanasyna estelik syılyq tabystady. Sonymen qatar, kórmege kelýshiler Elbasy ómirinen syr shertetin tyń derektermen tanysyp, tájirıbeli nusqaýshylardyń baıandamasyn tyńdady. Aýdan turǵyndaryna sırek kezdesetin beınematerıaldardyń, fotosýretter men arhıvtik qujattardyń jáne jádigerlerdiń biregeı kesheni usynyldy.
Qordaı aýdanynyń Áljan ana aýylynan bastaý alǵan kóshpeli kórme Taraz qalasynda jalǵasyn tapty. Jambyl oblysy Qazaqstan halqy assambleıasynyń «Dostyq» úıinde kitaphana, arhıv, mýzeı salalarynyń mamandary men memlekettik qyzmetshilerge arnalǵan «Elbasy kitaphanasynyń aqparattyq resýrstary» atty aımaqtyq kásibı sessııa ótti. Is-sharanyń maqsaty – qoǵamdyq sanany jańǵyrtý turǵysynan mádenı murany zertteý, nasıhattaý tájirıbelerin ortaǵa salý, sondaı-aq, kitaphana, arhıv, mýzeı salalaryndaǵy aqparattyq tehnologııalardy damytýǵa qatysty ózekti máselelerdi talqylaý bolyp tabylady.
Sessııa qatysýshylarynyń nazaryna «Bir jádigerdiń tarıhy», «Mýzeı kolleksııalary» jobasyn qamtıtyn «Mýzeı jınaqtary» ǵylymı-qor mýzeıtaný baǵdarlamasy boıynsha Elbasy kitaphanasy qyzmetkerleriniń zertteý jumystary usynyldy.
Sonymen qatar, Taraz qalasyndaǵy «Dostyq» alańynda Qazaqstan Respýblıkasynyń Tuńǵysh Prezıdenti – Elbasy kitaphanasynyń «N.Nazarbaev: dáýir, tulǵa, qoǵam» atty kóshpeli kórmesiniń ashylý saltanaty ótti. Áýeli jınalǵan jurtshylyq Kenen Ázirbaev atyndaǵy Jambyl oblystyq fılarmonııasy ónerpazdarynyń ónerin tamashalady. Saltanatty sharaǵa Jambyl oblysynyń ákimi Asqar Myrzahmetov qatysyp, óz sózinde Elbasy Nursultan Nazarbaevtyń táýelsiz memleket tarıhyndaǵy eren eńbegine toqtaldy. Budan keıin Elbasy kitaphanasynyń dırektory Ámirhan Rahymjanov kóne Áýlıeata óńirinde kóshpeli kórmeniń ótýiniń ózi el turǵyndaryna kórsetilgen erekshe qurmet ekenin atap ótti. Elbasynyń da Jambyl óńirine qurmetpen qaraıtynyn jetkizdi. Budan keıin Asqar Myrzahmetov pen Ámirhan Rahymjanov saltanatty jaǵdaıda «N.Nazarbaev: dáýir, tulǵa, qoǵam» atty kóshpeli kórmeniń lentasyn qıdy. Jambyl oblystyq tarıhı-ólketaný mýzeıine kirip, Elbasynyń ómiri men qyzmet jolynan syr shertetin derektermen tanysty.
Aıta keteıik, 2017 jylǵy qarasha aıynan bastaý alǵan «Nursultan Nazarbaev: dáýir, tulǵa, qoǵam» kóshpeli kórmesiniń jobasymen Almaty, Shymkent qalalary men Almaty, Túrkistan, Atyraý, Aqtóbe jáne Qyzylorda oblystarynyń 900 myńǵa jýyq turǵyny tanysyp úlgergen bolatyn. Al, Jambyl oblysynda jalǵasyn tapqan joba aǵymdaǵy jylǵy qazan aıynyń sońyna deıin jalǵasady.
Jambyl oblysy