Memleket basshysy Qasym-Jomart Toqaev muǵalimderdiń dástúrli Tamyz keńesinde sóılegen sózinde úsh aýysymdy jáne shaǵyn jınaqty mektepter máselesi óz sheshimin tabýy kerek ekenin atap kórsetti. Mundaı jaǵdaıda bilim sapasyn kóterý men jeti túrli ilim biletin urpaq tárbıeleý esh múmkin emes. Bilim berý isine qatysty Prezıdent paıymdaýynan týǵan túıinniń biri – qordalanǵan máselelerdi der kezinde anyqtap, ony sheshýdiń ońtaıly joldaryn usyný bolmaq.
Osy oraıda úsh aýysymdy mektepterdi joıý máselesi búginde Aqtóbe oblysynda ótkir kúıinde turǵanyn atap ótý kerek. Taıaýda bul másele oblystyq máslıhattyń áleýmettik-mádenı damý jónindegi turaqty komıssııasynyń keńeıtilgen májilisinde talqylandy. Osy otyrysta Oblystyq bilim basqarmasy basshysynyń mindetin atqarýshy Gúlnaz Súleımenova oblysta úsh aýysymda oqytatyn 13 mektep bar ekenin málimdedi. Bir óńir úshin muny az deýge bolmaıdy.
Sala jetekshisiniń aıtýynsha, bıyl úsh aýysymmen jumys isteıtin jeti mekteptiń máselesi óz sheshimin tappaq. Iаǵnı, alǵa qoıylǵan jumys jospary boıynsha atalǵan mektepterdegi oqý úderisi eki aýysymǵa kóshirilmek. Qalǵan altaýyna kelsek, turaqty komıssııanyń otyrysynda bul saýaldardyń jaýaby aıtylmaı qaldy.
Aqtóbe tabıǵı ósim turǵysynan, sondaı-aq syrtqy jáne ishki kóshi-qon esebinen jyl saıyn turǵyndar sany ósip kele jatqan óńir. Sonyń ishinde ótken jyldar men keıingi kezeńde de oblyspen shekaralas qonystanǵan О́zbekstannyń Qaraqalpaqstan Respýblıkasynan Aqtóbege qonys aýdarýshylar legi úzilip kórgen emes. Mundaı jaıt óz kezeginde oblys ortalyǵyndaǵy jalpy bilim beretin mektepterdiń júktemesin kóterip, kúrdelendirip jiberetini tájirıbede jıi baıqalyp júr.
Osyndaı qaýip aldaǵy oqý jylynda da baıqalatyn syńaıly. Atap aıtqanda, qazirgi kezde Aqtóbe qalasyndaǵy №63, №64 jáne №68 mektepterdiń úsh aýysymdyq rejimge kóshý tártibi anyq baıqalyp otyr. Iаǵnı, búgingi yqtımaldyq pen boljam erteńgi naqty kóriniske aınalyp ketýi ábden múmkin.
Degenmen, bir jylǵa qoıan terisi de shydaıdy degendeı, bir jylǵa oqýshylar men mektep ujymdary shydap, tózip kórer. Osy aralyqta jergilikti atqarýshy organdar men Bilim jáne ǵylym mınıstrligi tarapynan qosymsha jańa mektepter qurylystary shuǵyl jobalanǵany jón dep sanaımyz. Taǵy bir jol – júktemesi ortasha mektepterge úsh aýysymdyq mektepte oqıtyn oqýshylardy aýystyrý bolmaq. Sondaı-aq atalǵan sanattaǵy mektepterdiń janynan qosymsha qurylys salýdy qolǵa alý isi de túıindi tarqatýdyń bir joly bolmaq.
Búgingi tańda oblys aýmaǵynda respýblıkalyq jáne jergilikti bıýdjet esebinen 6470 orynǵa arnalǵan 21 mekteptiń qurylysy júrgizilýde. Onyń 15-i bıylǵy jyldyń aıaǵyna deıin paıdalanýǵa berilmek. Mundaı jaǵymdy jaǵdaı úsh aýysymdaǵy mekteptiń azaıa túsýine yqpalyn tıgizeri anyq. Osy oraıda oblysta úsh aýysymdy mektepterge qosa apatty jaǵdaıdaǵy úsh mektep bar ekenin de aıta ketken jón.
Munyń sheshimi qandaı bolar eken degen máselege kelsek, atalǵan úsh mekteptiń bireýin bıylǵy jyldyń sońyna deıin joıý belgilengen. Qalǵan ekeýi jańadan turǵyzylatyn mektep ǵımarattary jáne kúrdeli jóndeý júrgizilip jatqan mektepter esebinen joıylmaq. Qazirgi kezde oblystaǵy 33 bilim berý nysanyna jaı jáne kúrdeli jóndeýler júrgizilip jatqanyn eskersek, onyń sheshimi tabylatyny talassyz. Bul úshin oblys bıýdjetinen 845 mln teńge bólingen.
Prezıdenttiń Tamyz keńesinde ókiletti organdarǵa qoıǵan tapsyrmasynyń biri – shaǵyn jınaqty mektepterdiń jaǵdaıyn jaqsartý. Aldaǵy ýaqytta bul iste óz sheshimin tabýǵa tıisti máseleler az emes. Shaǵyn jınaqty mektepter kóp jaǵdaıda turǵyndar sany az shalǵaı aýyldarda bolatyny belgili ári basym kópshiligi kezinde qaradúrsin, sharýashylyq ádis boıynsha kádimgi saman kirpish pen aǵashtan turǵyzylǵany eshkimge de qupııa emes. Oblysta dál osyndaı 45 mektep bar eken. Ári onyń keıbireýi áli kúnge deıin peshpen jylytylatyn kórinedi. Mundaı jaǵdaıda ony qys kezderinde kómirmen jáne qımen qamtý qajettigi týyndaıdy. Ony jetkizý qazirgi kúnnen bastap oılastyrylmasa shaǵyn mekteptiń shaǵyn bólmesinde oqýshylar qys kezderinde dirdek qaǵyp otyrmasyna kim kepil?! Sonymen birge kóp jaǵdaıda shaǵyn jınaqty mektepterdiń ábden eskirip, tozyǵy jetip turǵany da udaıy nazarda bolýy tıis. О́kinishke qaraı oblysta buǵan baılanysty másele qozǵap júrgen eshkimdi estimeppiz. Osy oraıda Memleket basshysynyń shaǵyn jınaqty mektepterge qatysty paıymdy pikiri óńirdegi bilim berý salasynyń jetekshilerine oı salsa, qanekı.
AQTО́BE